BINTULU, 22 Mei — Sebuah rumah kayu dua ringkat ti bestatus enda tetap angus lengis ba penusah angus di Batu 7, Jalai Bintulu-Miri, lemai tu tadi.
Nitihka penerang ari Balai Bomba enggau Penyah Penusah (BBP) Bintulu, sida nerima kangau ngenyit bekaul enggau penusah nya urung pukul 3.14 lemai.
Berindik ari nya, tim raban enggau injin rebak keterubah enggau sebuah Tangki Ai dipindahka ngagai palan penusah nyadi ti bepalan urung 12 kilometer ari stesyen nya.
Raban bomba datai ba endur nya urung pukul 3.27 lemai lalu tekala nya berengkah bejalaika operasyen madamka api.
Komander operasyen madahka penusah angus nya ngaul sebuah rumah kayu dua ringkat pemesai 40 x 40 kaki persegi lalu api nya udah nganguska semua struktur rumah nya.
Raban bomba bejalaika operasyen madamka api ngena arus tunggal ti bisi dua muncung enggau 300 kaki hos ti disambung ngagai pam injin bomba nyentukka api mujur dijaga sereta padam abis.
Pengudah pengawa madamka api tembu, pengawa meresa ke silik agi dipejalaika ngena chara RECEO dikena nentuka nadai agi pun api ke tau ngujungka api nyadi baru sereta dikena nentuka gaya ba endur nya likun enggau penuh.
Operasyen nya mujur dijaga urung pukul 3.59 lemai lalu tembu penuh urung pukul 4.43 lemai sebedau raban bomba mupuk mulaika diri ngagai balai nya.
Nadai penusah bakal tauka bebadi nyawa diripotka nyadi ba penusah nya.
Operasyen nya mega nerima bantu ari kaban Bomba Kidurong enggau Polis Diraja Malaysia (PDRM). — RBI
#Beritalban | Ruai Berita Iban
Rinduka | Titihka | Kunsika
