SAMARAHAN, 21 Mei – Dagang mit enggau tengan pemesai (PKS) mengkang nyadi tulang belakang pemansang sosio-ekonomi Sarawak nengah pengawa nyendiaka peluang kereja enggau pemeri ngagai komuniti.
Sapit Premier Sarawak Datuk Amar Dr.Sim Kui Hian madah, pemujur kompeni mee menua tu udah mansang ari dagang mit ngagai chap dagang antarabansa nyadi kelai transformasyen chap Sarawak, ke diatu majak dikearapka ba makit dunya.
Ku iya, pemansang kompeni Lee Fah Mee ti ditumbuhka kenyau ari taun 1955, nyata ngayanka dagang menua Sarawak bisi penau mansang ari chap biasa ngagai kelai kelai nengeri ti dipebasa.
Nya alai, ku Dr.Sim, ‘chap Sarawak’ ukai semina nyebut produk ti diasilka di nengeri tu aja, tang mega mai imej kualiti, pengetan sereta standard antarabansa.
“Mayuh kompeni asal ari Sarawak, tang ukai semua nya bepenau nyadi ‘Chap Sarawak’ ke amat ulih mai nama nengeri tu ngagai renggat dunya…diatu standard kitai iya nya standard antarabansa,” ku iya.
Iya madah munyi nya lebuh bejaku ba pengerami bejadika pampang kedua kilang Lee Fah Mee, ditu, sehari tu.
Ku iya, pemujur kompeni nya ukai semina muka kilang baru aja, tang ngayanka pengulih dagang ruang bilik peranak lokal berubah, mengkang relevan sereta tan ba selampur rebak.
Ku iya, Lee Fah Mee ti berengkah ngasilka mi rangkai urung taun 1970-an diatu udah mujur ngaduka produk nitihka peminta kemaya hari, nyengkaum ngasilka mi ‘segera’ laksa Sarawak sereta mega produk pemakai ti ngembuan identiti menua tu.
“Produk baka tu patut dikunsi enggau dunya laban makit Sarawak aja kelalu mit.Lebuh peranak Sarawak di menua luar meli produk tu, sida ukai semina bebelika pemakai aja tang mega bekunsika identiti enggau cherita Sarawak,” ku iya nambah. -RBI
