SAMARAHAN, 21 Mei — Pengawa muka Jematan Batang Lupar No.1 enggau rasmi nyadi bukti komitmen Perintah Sarawak ti terus ngenegapka rentayan infrastruktur moden dikena nyungkak pemansang ekonomi enggau ngangkatka pengelantang pendiau rayat, ku Sapit Premier Datuk Amar Douglas Uggah Embas.
Ku iya, projek ikonik nya ukai semina nyambung Sebuyau enggau Triso aja, tang mega deka nyadi pematak besai ngagai penumbuh sosio-ekonomi, kelebih agi di menua pesisir enggau menua ulu sungai.
“Jematan tu kelai pengeran perintah nentuka rayat ngasaika perengka guna komunikasyen ke manah agi, likun sereta efisyen agi, lalu enggau nya muka mayuh agi peluang pemansang,” ku iya lebuh bejaku maya Pengerami Bejadika Jematan Batang Lupar No.1 ditu, sehari tu tadi.
Nitihku Douglas, pengawa ngaga jematan nya dikearapka ulih ngurangka timpuh pejalai enggau jauh kelimpah ari ngangkatka pemanah logistik enggau sistem pengangkut ba kandang endur ke bisi kaul.
Ku iya, projek ti meri empas tinggi nya mega dipechaya ulih nyungkak sektor ekonomi, betanam betupi enggau dagang temuai di Sebuyau, Triso enggau kandang menua besemak nengah akses ti lanchar sereta moden.
Jematan Batang Lupar No.1 ti digaga ari baruh Pakej D2B: Perambu Ngaga enggau Nembuka Jematan Batang Lupar 1, Bagi Menua Samarahan/Betong deka nyadi jematan pemadu panjai meraka sungai di Malaysia enti udah tembu penuh ila.
Projek ke beungkus RM848.7 juta nya mungkur pengawa ngaga jematan sepemanjai 4.844 kilometer nitihka standard JKR R5 enggau dua lurung sepiak, kelimpah ari ngembuan tali kabel besai sepemanjai 598.8 meter.
Jematan nya mega ngembuan ruang pemesai 250 meter enggau peninggi 26 meter dikena ngemudahka pejalai kapal, lalu enggau nya ulih ngenegapka sistem pengangkut ba koridor tebing tasik Sarawak.
Pengerami bejadi nya mega mandangka komitmen Perintah Sarawak ti deka terus bejalaika projek infrastruktur transformasyen ti ulih nyungkak pemansang pelilih menua sereta ngangkatka kualiti pengidup rayat ba selampur alai.
Sama bisi datai iya nya Dato Sri Haji Julaihi bin Haji Narawi, Menteri Perengka Guna enggau Telekomunikasyen Sarawak, ADUN Beting Maro Dato Haji Razaili bin Haji Gapor, ADUN Lingga Dayang Noorazah Awang Sohor, Direktor Opis Kereja Raya Sarawak Datu Dr.Cassidy anak Morris, Residen Bagi Menua Betong, Datu Richard anak Michael Abunawas.- RBI
