KUCHING, 19 Mei – Gempung Parti Sarawak (GPS) sedia napi pengawa bepilih sebarang maya laban seruran komited gawa sereta bejalaika tanggungpengawa, ukai semina maya musim pengawa bepilih aja, ku Ketuai Pemadah Parti Pesaka Bumiputera Bersatu (PBB), Datuk Sri Abdul Karim Rahman Hamzah.
“Lebuh rayat meda perintah ke udah diberi mandat nya enda kelalu bepolitik sereta ngemeratka pemansang nengeri, insya Allah rayat deka terus nyukung nya,” ku iya nerang.
Berebak enggau nya, iya madahka PRN Sarawak enda ulih diseliah berindik ari penggal DUN deka abis ujung taun tu tauka pengabis laun bulan Februari taun baru.
“Enti DUN enda direrak tumu, pengawa direrak automatik deka nyadi pengudah abis timpuh lima taun baka ti udah diungkupka dalam undang-undang pengawa bepilih.
“Enti pengawa ngererak automatik nyadi, pengawa bepilih enda tau enda diatur dalam timpuh 60 hari lalu nya kebuah aku madah pemadu laun bulan Februari,” ku iya.
Iya ke mega Menteri Pemansang Nembiak, Lumba enggau Orang Dagang madah munyi nya ba aum pengarang berita pengatur Breaking News Run 2.0 Night Edition, di Kompleks Dewan Undangan Negeri Sarawak, ditu, sehari tu.
Abdul Karim mega nyebut Pengawa Bepilih Nengeri (PRN) Sarawak patut diatur berebak enggau Pengawa Bepilih Besai (PRU) nyema Parlimen direrak tumu, pia ku Ketuai Pemadah Parti Pesaka Bumiputera Bersatu (PBB), Datuk Sri Abdul Karim Rahman Hamzah.
Nitih ku iya, peluang PRU diatur tumu enda ulih dikeenggaika berindik ari gaya politik ke nyadi diatu ba sekeda nengeri di Semenanjung Malaysia maya ke diatu.
“Gaya politik di nengeri Melaka, Johor enggau Negeri Sembilan, sereta mega penyarut dalam sekeda parti bisi potensial ngachau pemutus Perintah Besai ngererak Parlimen tumu.
“Ke bendar, beberapa buah nengeri mega dipeda benung berundingka peluang ngatur pengawa bepilih nengeri sida empu, nya alai bisi peluang PRU tumu tau nyadi.
“Nya alai, aku empu beratika manah agi enti PRN Sarawak diatur berebak enggau PRU laban atur tu ulih ngelimatka ungkus ungkup perintah enggau Komiti Pengawa Bepilih (SPR),” ku iya.
Nerang silik agi, iya madah, ngatur pengawa bepilih serentak lebih engkeman laban enti diatur kediri, ungkus ke diguna ulih manggai nyauka RM1 bilion ungkup tetiap pengawa bepilih.
“Lebuh rega minyak niki, ungkus pengidup rayat mega niki lalu mayuh pekara bukai mega kena empas.Nya kebuah Menteri Besai patut bebendar berunding sekalika deka nganti tauka megai sida tumu agi.
“Kebuah pia laban ungkus ngatur pengawa bepilih diatu besai amat lalu pengawa ngena duit mensia mayuh patut diatur enggau bejimat agi.Abis nadai kitai ulih nyimpan mayuh duit lalu SPR mega enda ibuh ngeluarka belanja kelalu mayuh,” ku iya nyemetak. – RBI
#ruaiberitaiban#newsiban#beritaiban
Rindu | Titih | Kunsika
