Pemajik, pengandal enggau pengerindu ke dalam ngagai budaya pesaka asal Iban nyadi batang penegap Olivia Ontai lebuh iya dipadu nyadi Kumang Gawai Dayak Saratok 2026 pengudah ngalahka empat iku penyereta bukai ba pekit final ke diatur apin lama ke udah.
Pemenang nya ukai semina nyadi maya ti pemadu besai reti dalam pengidup iya, tang mega muka ruang ngagai iya terus ngetanka adat enggau budaya komuniti Dayak, kelebih agi ba raban nembiak rebak baru.
Kenu ku Olivia, iya berasai amat beterima kasih sereta temegah ati lebuh dipadahka nyadi pemenang besai pekit ti beprestij nya.
“Terima kasih ngagai semua ke seruran nyukung aku sepemanjai pekit tu.
“Aku berasai gaga endar ati sereta teperansang amat laban udah dipaduka menggi gelar Kumang Gawai Dayak Saratok 2026,” ku iya lebuh dirandau Ruai Berita Iban.
Olivia Ontai Odau ke datai ari Rumah Chaong, Sungai Engkerumai, Ulu Roban, Saratok bebansa Kenyah-Iban. Apai iya bansa Kenyah seraya indai iya bansa Iban. Iya anak keempat ari enam iku diri menyadi.
Ku iya, pengerindu iya ba pekit Kumang berengkah ngerembai kenyau ari mit lebuh iya suah meda bala penyereta mantaika pemanah diri ba panggau pekit.
“Aku endang ngembuan minat ke chukup besai enggau pekit Kumang. Kenyau ari mit, aku alit ati meda bala penyereta bejalai ba atas panggau lalu ari nya datai pengerindu nguji diri empu,” ku iya.
Ari sukut akademik, Olivia baru udah nembuka pelajar STPM di Saratok lalu diatu benung nganti pemutus peresa iya.
Sebedau bulih gelar Kumang Gawai Dayak Saratok 2026, iya mega udah ngerikod sekeda pemujur ti ngemegahka ati ba pekit bekaul enggau budaya sereta pemajik, nyengkaum Pesta Pemakai Kumang Roban 2024 enggau gelar Selinggar Matahari Gawai Dayak Saratok 2025.
Kelimpah ari chakah nyereta pekit, Olivia mega chakah dalam aktiviti budaya kenyau ari sekula suba, nyengkaum mandangka main asal enggau program ke bekaul enggau pesaka asal komuniti Iban.
Bekunsi pasal pengawa nyediaka diri sebedau bepekit, iya madahka mayuh sukut patut diperatika nyengkaum penemu budaya, komunikasyen, pengangkun diri enggau gamal.
“Aku nyediaka diri nengah chara belajarka adat enggau main asal Iban baka bejawang enggau beganu, kelimpah ari ngelatih pengandal diri bejaku ba mua orang mayuh sereta chara bejalai ba atas panggau,” ku iya nerang.
Kenu ku Olivia, siti ari pemar ke besai sepemanjai pekit tu iya nya belatih ninting hari sereta ngena ngepan asal ke berat dalam timpuh ke panjai.
“Aku ngena ngepan ti pemerat lebih 20 kilogram berengkah urung pukul 3 lemai nyentuk ke lebih pukul 1 pagi. Nya endang amat mayuh pemar sereta begunaka pengeliat tubuh enggau runding,” ku iya.
Berebak enggau nya, iya nyemetak madahka nembiak rebak baru megai tanggungpengawa ke besai nentuka adat, budaya enggau jaku Iban terus dijaga ngambika enda lenyau nitihka jeman.
“Raban nembiak patut ngembuan pengerindu belajar pasal budaya diri empu. Nambahka nya anang malu ngambi matapelajar Jaku Iban di sekula laban jaku nya kelai bansa,” ku iya.
Ngelansa pasal pengawa ngena ngepan maya pekit nya, Olivia madahka diri ngelimpangka diri mansik tetiap kereban enggau tusun perengka pengias asal nya dikena nentuka guna iya nitihka adat enggau budaya ke bendar.
“Aku mayuh betanya ngagai sida ke lebih teleba nyengkaum tukang kebat enggau tuai raban bansa, pia mega ngiga penerang ba internet,” ku iya.
Taja mujur bulih gelar besai tu, Olivia mega ngaku penau sereta pemanah penyereta bukai ti bela ngembuan pengelebih enggau penau kediri empu.
“Pemekit ke bukai endang layak nerima anugerah Video Kreatif enggau Ngepan Pemadu Manah laban pemekit ke bukai bisi pengelebih kediri empu dibantaika sida ba pekit tu.
“Tanggungpengawa aku nyadi Kumang Gawai Dayak Saratok 2026 iya nya meransang nembiak rebak baru awakka sama-sama belajarka adat sereta main asal, meransang sida awakka besemekih ba penggawa besekula sereta nyaga ulah diri empu” ku Olivia.
Bekaul enggau pengidup dudi hari, Olivia bisi juluk ati deka nampung sekula ngagai tikas ke tinggi agi udah tu sereta deka nyadi pengelicha ke niti entali nembiak rebak baru jemah ila.
Iya mega nangkan, enti bisi ngembuan minat deka enggau bepekit anang takut nguji. Belajarka main asal, belajai ba mua mayuh enggau ke bukai. Enti ukai kitai sapa agi meh ke deka niti entali pengawa sida ke tuai.
Iya mega ninggalka jaku pesan ngagai nembiak indu ke agi biak ti bisi ati nyereta pekit Kumang ngambika enda takut nguji sereta seruran bebendar ngemanahka diri.
“Enti bisi minat, anang takut nguji. Belajarka budaya diri empu lalu berani ngayanka diri ba mua orang. Enti ukai kitai ke neruska legasyen tu, sapa agi?” ku iya ngujungka randau enggau Ruai Berita Iban. -RBI
#ruaiberitaiban#newsiban#beritaiban
Rindu | Titih | Kunsika
