LIMBANG, 24 April — Perintah Sarawak nagit penambah penyukup beras ngagai 60 peratus manggai ba taun 2030 nengah pengawa bejalaika projek pemansang padi bedandang besai nyengkaum ba kandang menua Limbang Valley.
Sapit Menteri Industri Pemakai, Komoditi enggau Pemansang Kandang Menua (Industri Pemakai), Datuk Dr.Haji Abdul Rahman Ismail, madahka diatu Sarawak semina ngerikod tikas ngatika diri urung 21 peratus enggau pemansut 51,000 tan metrik.
“Pengawa tu beguna amat berindik ari Sarawak agi bepanggai ba import beras lebih 194,000 tan metrik ti beungkus lebih RM585 juta,” ku iya lebuh bejadika pengerami Sarawak Agrofest Limbang 2026 di kandang Lot 777, mengeri Limbang, sehari tu tadi.
Nitihku iya, projek Limbang Valley mungkur pengawa ngemansangka lebih 3,000 hektar tanah ti mungkur tanah perintah sereta mega tanah Hak Adat Bansa Asal (NCR).
Iya nyemetak madahka pengawa ngemansangka tanah NCR deka dipejalaika enggau chara inklusif sereta beserakup, enggau kaul pengempu tanah nyadi bakih strategik dalam rentayan pemansut.
“Chara tu ukai semina deka nambahka asil padi, tang mega nentuka pengempu tanah NCR mega ngasaika penguntung ekonomi nengah pengawa chakah ngambi bagi dalam projek betanam betupi moden,” ku iya nerang.
Renggat keterubah pemansang mungkur pemesai 1,175 hektar di Limbang enggau Lawas nyengkaum Kampung Pandam enggau Kampung Sinampuan Laut, Sundar.
Projek tu deka ngena teknologi moden enggau bansa benih padi ti meri asil tinggi dikena nambahka produktiviti enggau daya bepekit sektor padi nengeri tu.
Sama bisi datai Kaban Kunsil Nengeri (ADUN) Batu Danau Dato Paulus Palu Gumbang, Sapit Direktor Betanam Betupi Sarawak Radzhiah Bt Jack, Menija Besai Kaunsil Pengempung enggau Pengintu Tanah Sarawak (SALCRA) Datu Joseph Blandoi, Direktor Opis veteriner Sarawak, Datu Dr Adrian Susin Ambud sereta temuai dipebasa bukai.— RBI
