KUCHING, 21 April — Premier Sarawak, Datuk Patinggi Tan Sri (Dr) Abang Johari bin Tun Datuk Abang Haji Openg, bejadika Pengerami Muzium Pesaka Industri Brooke Dockyard, ditu kemari.
Bejaku ba pengawa nya, Premier Sarawak madahka bisi perambu deka ngemansangka projek tebing sungai sepemanjai 4.8 kilometer ti deka nyambung kandang endur Brooke Dockyard enggau Jematan Satok dikena nempa koridor dagang temuai besepadu bepelasarka pesaka enggau main asal.
Renggat keterubah projek nya dipelaba deka berengkah taun baru enggau agih belanja urung RM160 juta, lalu ditangkan enggau renggat kedua ti beungkus RM400 juta, ti deka ngayanka langkar arkitektur ti nyelai nyengkaum jalai bejalai kaki ti tinggi dikena nyaga pengelantang komuniti lokal.
“Pemansang tu deka meri peneleba ke bebida ngagai temuai, kelimpah nyambung elemen sejarah, budaya enggau pengidup komuniti ba kededua tebing sungai,” ku iya.
Iya mega nambah, Sarawak diatu bulih kelala antarabansa enggau sekeda kelala global nyengkaum Palan Pesaka Dunya Taman Negara Gunung Mulu enggau Taman Negara Niah, kelimpah ari kelai Kuching nyadi mengeri gastronomi.
Ku iya nambah, pengawa ngulihka kelala geopark ari UNESCO ungkup kandang menua Kuching Delta deka muka siti agi dimensi baru dalam ngenegapka penuduk Sarawak nyadi palan dagang temuai tikas dunya.
Berebak enggau nya, iya mega madahka penambah aksesibiliti nengah inisiatif penerebai bilun serantau AirBorneo deka nyadi pelasar ke beguna dalam mai mayuh agi temuai ngagai nengeri tu.
Iya mega meri besai terima kasih ngagai Opis Menteri Dagang Temuai, Industri Kreatif enggau Seni Persembahan Sarawak sereta Opis Muzium Sarawak ti seruran bebendar ngemujurka projek nya.
Sama bisi datai Sapit Premier Sarawak Datuk Amar Prof Dr Sim Kui Hian, Speaker Kaunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Perengka Pengangkut Sarawak Dato Sri Lee Kim Shin, Sekretari Mendam Perintah (Perambu Ekonomi enggau Pemansang) Sarawak Dato Sri Dr Muhammad Abdullah Zaidel, Sapit-sapit Menteri sereta temuai dipebasa bukai. — RBI
