MUKAH, 19 April – Penatai Kaban Kunsil Nengeri (ADUN) Tellian, Royston Valentine, ngerichaka agi pengerami Bazar Malam UiTM Siri 8 lebuh iya ngabas bansal bejual sereta bejalaika sesi nyabut tikit benasit kena Hari Lima tu tadi.
Penatai iya ngayanka sukung iya ti terus ngatur program komuniti ti meri empas positif ngagai pemansang ekonomi kandang menua.
Program ke diatur ba Takan Beramih, Universiti Teknologi MARA Pampang Sarawak, Kampus Mukah, diatur kena 17 ngagai 19 April 2026, lalu enggau nya ngerindang gaya kampus enggau penatai bala nembiak sereta komuniti menua nya.
Berambaika leka jaku “Riuh Raya Street Fiesta Series 8”, pengawa sekali tu bisi mantaika mayuh macham aktiviti ti narit ati ti ukai semina ngerichahka pengerami Hari Raya Aidilfitri, tang mega ngerapitka kaul komuniti dalam gaya ti lantang.
Program tu mega nyadi pelasar ngagai orang dagang mit enggau nembiak ngelakuka produk sida empu, lalu enggau nya nerenakka budaya dagang ba raban nembiak rebak baru.
Sepemanjai bazar tu, bala temuai dipandangka enggau mayuh macham pemakai ke tebilang sereta tradisional, ai irup ke ngelantangka ati sereta bejualka gari raya ke engkeman enggau pengerindu kemaya hari tu.
Kelimpah ari nya, bemacham aktiviti kebukai mega diatur dikena nambahka pengagit ati, lalu enggau nya nyadika program tu siti ari pematak batang ba kampus sepemanjai musin pengerami tu. -RBI
