KUALA LUMPUR, 15 April – Jaku tuduh ti madahka perintah madahka bantu ngagai pekebun padi tang enda mujur ngenataika bantu nya enda betul sereta tau ngasuh rayat saru penemu.
Menteri Betanam Betupi enggau Pengelikun Pemakai, Datuk Seri Haji Mohamad Sabu nerangka, bantu ngagai pekebun padi nya kebendar iya dipejalaika nitihka proses ti udah ditetapka, lalu ukai enda dibayar baka ti didawa.
“Perintah MADANI udah nikika Insentif Nasih Ngagai Orang Bumai Padi (IPKP) ari RM100 ngagai RM160 sehektar berengkah musin 1/2025, lalu bedau lama tu tadi udah madahka deka nikika agi ngagai RM300 sehektar,” ku iya.
Iya madah, ungkup musin 1/2025, bayar IPKP udah tembu penuh ti ngaul agih belanja sepenyampau RM39.314 juta ngagai lebih 135,000 iku pekebun padi di serata Semenanjung.
“Ungkup musin 2/2025, lebih RM27 juta udah dibayar naka ke diatu, seraya urung 30 peratus peminta ke agi tinggal benung dalam proses lalu deka diputarka dalam timpuh ke semak,” ku iya nerang.
Nitih ku iya, chara mayar IPKP bepelasarka konsep “gaga dulu, baru minta”, enda baka bantu mata duit baka BUDI Agri-Komoditi ti dipasukka terus ngagai akaun penerima.
“Chara tu dikena laban kandang endur betanam orang bumai berubah nitihka musin.Bisi sekeda nanam mayuh agi, lalu bisi mega ngurangka kandang endur.
“Nya alai bayar digaga bepelasarka pengawa ke bendar dikena nentuka pengawa terang ngena duit mensia mayuh,” ku iya.
Ku iya nambah, bida musin nanam entara nengeri mega nyadi faktor bayar enda ulih digaga sereta.
“Ambika chunto, maya Kedah masuk musin nanam baru, nengeri bukai baka Kelantan nyangka agi dalam renggat ngetau.Nyadi proses nuntut enggau mayar nyadi berenggat,” ku iya.
Iya nerang agi, setiap peminta ke dianjung deka nengah proses ngentaska palan sebedau bayar dikemendar.
Kelimpah ari nya, perintah mega udah meri kelala Insentif Ngetau Padi (IPP) sepenyampau RM50 sehektar berengkah ari taun 2025, nyadi bantu baru ngagai orang bumai.
“Tu inisiatif baru ti enda kala ditempa sebedau tu, lalu proses mayar mega ngena chara peminta ke sama,” ku iya.
Berindik enggau nya, iya nyemetak madahka dawa ti madahka perintah enda mayar bantu nya nadai pengamat.
“Pekara ke bendar iya nya bantu nya udah dibayar, benung dibayar, lalu peminta ke agi tinggal deka terus diputarka pengudah proses ngentas tembu,” ku iya nyemetak.
Berebak enggau nya, iya mega ngaku bisi pengelemi dalam pengawa bejalaika nya nyengkaum isu penyendia servis enda mulaika bayar lebih ngagai orang bumai.
“Pekara tu benung diperatika lalu opis menteri deka madahka pengawa ngemanahka peminta enggau chara mayar dalam timpuh ke semak tu,” ku iya.
Iya mega ngingatka mensia mayuh anang mudah tekuing runding enggau dawa ke enda amat ke udah viral ba media rama.
“Rayat kemaya hari tu majak pintar beratika sapa ke amat gawa enggau sapa ke semina bemain politik aja,” ku iya nambah. -RBI
