SONG, 15 April — Kaunsil Pemansang Koridor Wilayah (RECODA) ngepunka hari keterubah penemuai bekaul sosioekonomi ngagai Ejensi Pemansang Ulu Rajang (URDA) nengah pengawa mansik baru sekeda projek ti meri empas tinggi ti meransang pemansang ekonomi komuniti enggau kandang menua di Song.
Penemuai dua hari nya nyadi pelasar ke beguna dikena beratika pemanah pengawa bejalaika program sosio-ekonomi RECODA, kelimpah ari ngenegapka pengawa ke seruran dipejalaika dalam meri peransang ngagai komuniti menua pesisir sereta meransang penumbuh ekonomi ke inklusif sereta meruan ba pelilih URDA.
Penemuai nya dipunka di Sebuluh nengah Projek Skala-Up Kopi ari baruh Pelin Pemansang Sosioekonomi (Pelaksanaan) SEDP-i, ti ngemeratka pengawa nambahka kapasiti pemansut enggau nilai tambah industri kopi menua tu nyadi pun penatai pemisi baru ungkup peranak.
Raban nya udah nya nemuai ngagai orang dagang ti nerima program COMMUNITY@SCORE di Jalai Takan ti bejalaika dagang ngaga roti.
Inisiatif tu ngayanka pemanah pengawa nyukung dagang mit enggau jelan pemesai (IKS) dalam ngenegapka ekonomi renggat baruh.
Udah nya, penemuai nya diteruska ngagai Palan Madu Upper Rajang (URHC) ba Palan Inovasyen Saberkas, Pampang Katibas, sebengkah projek ari baruh Program Komuniti Impak Tinggi (HICP) ti ngemeratka pengawa memproses madu engkelulut dikena nambahka rega komersial enggau pemasar produk menua tu.
Sama bisi datai Kaban Kunsil Nengeri (ADUN) N.62 Katibas, Lidam Assan, Menijar Projek Madu Engkelulut Scala Besai ari Universiti Sains Malaysia (USM), Dr. Mohd Zulkifli Mustafa, Penyanding Penemu Projek ngagai USAINS Holding Sdn Bhd, Syed Yusof Syed Kechik serta wakil TERAJU Sarawak, Suriyadi Muhammad Nasir. -RBI
