NIAH, 31 Mac — Komuniti Penan dilalau ngaga ubah runding nengah chara ninggalka pengawa betanam betupi ngidupka diri lalu ngalih ngagai pengawa betanam betupi komersial beraban dikena nentuka sosio-ekonomi komuniti nya meruan.
Tesau nya dikenataika Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Anak Utom lebuh bejadika Pengerami Penan “Tipun Pinum Pengida’ Penan” 2026 di Kampung Mareng, Jematan Suai, Niah, kena Hari Enam tu tadi.
Pengerami tiga hari berunggu ke diatur ari 27 ngagai 29 Mac tu, iya nya keempat kali diatur Gerempung Pemansang Tipun Penan Sarawak (PETIPUN), enggau rambai jaku “Empowering The Penan: Mapping Our Future” enggau juluk jaku “Jah Ha’ Jah Kenin”.
Ba jaku iya, Dato Sri Dr Rundi nyemetak madahka ubah runding nyadi pelasar pemansang komuniti menua pesisir.
Ku iya, gempuru nya ukai semina pengerami aja, tang nyadi pelasar dikena ngenegapka identiti bansa Penan sereta nyikap nembiak rebak baru napi pemar ekonomi jemah ila.
“Udah datai ba maya iya kitai mandangka penau komuniti Penan ngagai dunya.
“Image enggau reputasyen komuniti nyadi aset beguna ti patut dijaga,” ku iya.
Iya ngemeratka pemesai guna ngempung teknologi betanam betupi pintar, ngena Internet of Things (IoT), sereta ngempung tanah nyadi kluster nyadi kunchi dikena nambahka asil betanam betupi enggau status wang komuniti.
Ambika chunto, tanah pemesai dua ekar dipegulai nyadi kluster 36 pintu ulih ngasilka 72 ekar utai tanam ti ulih dijual.
“Pemujur enda ulih dijapai kediri. Kitai enda tau enda mindah beraban,” ku iya nyemetak.
Dr Rundi mega ngingatka nembiak rebak baru muai ati dengki ngagai pemujur orang bukai laban nya semina deka nekul penyulut komuniti.
Iya mega nyemetak madahka pemuntan ba pelajar formal ukai penentu mutlak pemujur individu, tang semua orang bisi pengering enggau pengulih kediri empu.
Iya minta komuniti Penan ke mujur nyadika ikon enggau inspirasyen sida, nyengkaum Temenggong Komuniti Penan, Datuk Hasan Sui, enggau Presiden PETIPUN ke mega Residen Bintulu, Datu Nyurak Keti, ke nyadi Penan keterubah mangku pengawa Residen dalam sejarah Sarawak.
Dalam konteks pemansang ekonomi, Dr Rundi madahka Sarawak diatu dikelala nyadi pelilih menua bepenatai pemisi tinggi, enggau tagit perintah deka nyapai penatai pemisi ambis nadai RM15,000 ungkup tetiap ruang bilik menua pesisir manggai ba taun 2030.
Nyadika manifestasyen komitmen perintah ngagai komuniti Penan, sepenyampau RM100,000 udah diungkupka iya nya RM50,000 ngagai PETIPUN, RM20,000 dikena meri kuasa ngagai Biro Indu, enggau RM30,000 ngagai Komuniti Kampung Mareng enggau Komiti Pemansang enggau Pengelikun Genturung Pendiau (JKKK) Kampung Mareng.
Pengerami nya bela dirami enggau pengawa mandangka main asal nyengkaum main asal Bolu Biduk, Ngiteu (Sayau Titot) ari Baram, enggau Sagak Penan ari Belaga.
Lumba enggau main asal mega bisi dipekitka iya nya Meput (Nyumpit), Ngelaveng (perejuk tinggi), Mapem (perejuk jauh), Selekit (Nikau gelung rutan) enggau Pelaboh (netak kayu). — RBI
