KUCHING, 31 Mac — Pemansang infrastruktur di Sarawak majak ditegapka lebuh lapan projek jematan besai di nengeri tu dipelaba tembu nitihka timpuh manggai ba taun 2026.
Sapit Premier Sarawak, Datuk Amar Douglas Uggah Embas madah, pengawa bejalaika projek nya mengkang nitihka pejalai ke betul taja pan gaya dunya enda tentu tegap nyengkaum penyarut di Asia Barat.
Nitih ku iya, sebarang pemar ke diatu naka ke diatu nadai ngeruga pengawa bejalaika projek kesemua nya.
“Ungkup lapan buah jematan ke diperambu deka tembu taun tu, kitai enda kelalu irau ati.
“Engka bisi sekeda penanggul, tang nya enda ngeruga pengawa bejalaika selampur pengawa nya.
“Kitai andal semua projek tu deka bejalai enggau lanchar lalu ulih ditembu nitihka perambu,” ku iya.
Iya madah munyi nya lebuh dikerandau raban media pengudah bejadika Program Libat Urus Infrastruktur Sarawak 2026 ba sebuah hotel ditu, sehari tu tadi.
Uggah ke mega Menteri Infrastruktur enggau Pemansang Palan Penyangkai Kapal Sarawak madah, pengawa matau enggau silik deka terus dipejalaika nyengkaum ngatur randau ke enda ngetu enggau raban ke bisi pemerat.
Singkang tu beguna dikena nentuka pengawa ngulihka kereban ngaga enggau perambu projek mengkang teratur, kelebih agi napi gaya global ke enda tentu diatu.
“Ambika chunto, aku apin lama ke udah ngatur randau ba Palan Konvensyen Borneo Kuching (BCCK) dikena mansik sukut pengawa ngulihka kereban dikena ngaga rumah enggau perambu projek.
“Kitai deka nentuka semua perambu beratika gaya ke diatu ngambika pengawa bejalaika projek tu enda tekeruga,” ku iya nerang.
Ba pemansang ke bekaul, iya madahka projek Jematan Batang Lupar I diatu ngayanka penyulut ke chukup meransang sereta ba renggat dipejalaika enggau manah.
Entara lapan projek jematan ke dipelaba tembu taun tu iya nya Jematan Batang Lupar I enggau II, Jematan Batang Krian, Jematan Sungai Limbang, Jematan Batang Paloh, Jematan Batang Saribas II, Jematan Sungai Sejingkat enggau Jematan Batang Rambungan.
Dulu agi ari nya ba jaku iya, Uggah madahka Sarawak diatu masuk ngagai renggat baru pemansang infrastruktur ti jampat agi di baruh Atur Pemansang Malaysia Lumpar Ke-13 (RMK-13).
Nitihku iya, sepenyampau 852 projek infrastruktur ti beungkus sepenyampau RM52.4 bilion udah dikemendar ti ngaul agih belanja ari Perintah Besai enggau Perintah Sarawak ti deka dipejalaika Opis Kereja Raya (JKR) Sarawak.
Ari penyampau nya, 287 projek beungkus RM26.5 bilion diatu benung ba renggat ngaga, lalu 565 projek agi beungkus RM25.8 bilion benung ba renggat nyediaka tinda.
“Pengawa bejalaika projek besai tu begunaka koordinasyen tikas tinggi, disiplin bejalaika pengawa enggau kaul ti seruran dipejalaika entara semua raban,” ku iya. — RBI
Photo — JKR Sarawak
