KUCHING, 28 Mac — Perintah Sarawak benung mansik bansa bantu ti deka dipadahka enda lama agi dikena ngelempungka penanggul rayat berindik ari rega barang ti niki ketegal pemansang dunya.
Menteri Kereja Raya, Dato Sri Alexander Nanta Linggi madah, pekara nya bisi disebut Premier Sarawak Datuk Patinggi Tan Sri Abang Johari tun Openg ba sebengkah pengerami ke diatur ditu, malam Hari Lima.
Nitih ke Nanta, Premier Sarawak seruran ngemeratka pengelantang pendiau rayat sereta sensitif enggau sebana rayat, kelebih agi dalam napi empas ari ungkus pengidup ke diatu.
“Aku chukup temegah ati meda iring tuai Premier Sarawak Datuk Patinggi Tan Sri Abang Johari ti seruran ngemeratka pekara ti diguna rayat sereta enda kala leju mendingka sebana rayat.
“Lebuh ke bejaku, iya (Premier Sarawak) madahka Perintah Sarawak benung mansik bansa bantu ti deka dipadahka enda lama agi dikena mantu rayat ti napi empas ketegal rega barang niki berindik ari pemansang dunya, kelebih agi konflik tauka penyarut ti nyadi di Timur Tengah,” ku iya dalam penerang ti dikunsi dalam Facebook iya, sehari tu.
Nanta ke mega Kaban Parlimen Kapit madah, Abang Johari mega bisi madah pekara nya udah dikerandau enggau Sapit Premier Sarawak Datuk Amar Douglas Uggah Embas ke mega nyadi Menteri Pekara Wang II.
Ku iya, pansik ke silik agi benung digaga ngambika bantu ke diberi nya amat meri penguntung ngagai rayat.
Kelimpah ari nya, Nanta madahka Premier Sarawak mega bisi ngenang pasal gaya geopolitik dunya ti meri empas besai ngagai ekonomi dunya nyengkaum konflik di Asia Barat sereta menua ti ngeluarka minyak baka Venezuela enggau Iran.
“Pekara ti nyadi tu terang amat mandangka bepanggai ba minyak fosil ulih meri empas besai ngagai penegap ekonomi.
“Taja pia, Sarawak diatu ba pelasar ke betul enggau ngalih ngagai energi alternatif baka solar, hidrogen enggau minyak penerebai bilun ti meruan (SAF),” ku Nanta.
Ku iya madah baru, siti aum deka diatur enda lama agi dikena ngenyampatka pengawa ngena SAF ke deka bechairman Premier Sarawak.
Bekaul enggau pekara ke sama, ku iya, sistem perengka pengangkut mensia mayuh nyengkaum Transit Aliran Automasi (ART) mega deka ngena teknologi hidrogen setipak enggau komitmen nengeri nuju ngagai energi beresi.
Chara strategik nya, ku iya, beguna amat dikena nentuka penegap ekonomi sereta pengelantang pendiau rayat Sarawak dalam timpuh panjai.
