PAKAN, 26 Mac — Isu enchuri kabel komunikasyen ti majak ngirauka ati di menua pesisir nyadi entara batang fokus Program Ketuai Begulai enggau Rayat di Rumah Willie, Darau Atas, empai lama.
Nitihku Datuk Larry Sng Wei Shien, Chairman Kaunsil Industri Kayu Ramu Malaysia (MTIB) ke mega Kaban Parlimen Julau, peranak di kandang menua Pakan enggau Julau dilalau lengkas ngerikod gambar tauka video nyema bisi tetemuka sebarang aktiviti ke dipelabaka bekaul enggau kabel komunikasyen.
Ku iya, rikod nya tau nyadi bukti beguna dikena mantu piak bekuasa ngambi atur ke terit ngagai individu ke nadai tanggungpengawa.
Ku iya nerang, enti pengawa enchuri kabel majak nyadi, kompeni penyendia servis baka MCMC, CelcomDigi enggau Maxis nyangka deka napi pengerugi besai.
Ku iya nambah, empas ari pengerugi nya pengujung iya deka ditanggung rayat ti bepanggai ba perengka guna komunikasyen ninting hari.
Berindik enggau nya, iya ngarapka pengawa enchuri kabel tu ulih diketuka enggau lengkas dikena nentuka pengelantang enggau penerus servis komunikasyen ba kandang endur ke kena bungkur.
Ba program ke sama, sepenyampau RM76,055 mega dikenataika ungkup pengawa bejalaika projek komuniti ti ngaul JKKK Rh Willie, JKKK Rh Levis, JKKK Rh Berayun, JKKK Rh Gunda enggau JKKK Rh Mathew Lubuk Pisang, pia mega Biro Indu Rh Willie enggau Biro Indu Rh James. – RBI
