MIRI, 26 Mac – Siku burung beruie ari bansa Kelingking ke bakal pengudah ngelantak dinding ba sebuah begunan mujur diselamatka dalam penusah ke nyadi di Kuala Baram, lalu enggau nya mandangka pemesai guna chara ngintu jelu siga ba kandang mengeri.
Penusah ke nyadi kena 24 Mac urung pukul 5.20 lemai nya, siku burung lelaki ke ngembuan pemerat 0.75 kilogram nya udah diserahka Opis Bomba enggau Penyah Penusah Malaysia ari Balai Bomba Lutong ngagai Kaunsil Pengintu Kampung Sarawak (SFC) di Opis Wilayah Miri ngambika atur nangkanka nya dipejalaika.
Bepelasarka penerang keterubah, burung nya dipelabaka bisi bakal mimit pengudah tepawah ngagai struktur begunan sebedau mujur diselamatka raban bomba ti betuaika PBT II Henry anak Jugah enggau PB Steward anak Janting.
Penusah nya ngayanka kaul entara jelu siga enggau pemansang mengeri ti majak nambah ke diatu nyau majak tampak.
Spesis burung tu dikelala enggau nama Bruie ba raban bansa Iban, ngembuan daya nelebaka diri ke tinggi lalu majak mayuh ditemu ba kandang mengeri baka di Miri.
Ari gaya tu nyadika iya siti ari bansa burung betangkung ti pemadu mudah dilawa semak enggau palan pengentap pendiau mensia.
Lebuh diserah, burung nya ditemu kurang regas. SFC tekala nya bejalaika pengawa meresa pengerai keterubah enggau matau enggau silik dikena beratika takah bakal enggau proses gerai.
Pengawa berubat ke nangkanka nya deka terus dipejalaika sebedau sebarang pemutus digaga dikena ngelepaska iya pulai ngagai endur asal iya.
Chara tu setipak enggau konsep ngintu “nyelamat, mulaika pemanah sereta ngelepaska” ti dikemeranka SFC iya nya nyelamat, ngubat, mulaika pemanah sereta ngelepaska jelu siga ngagai endur ti engkeman dikena nentuka pengidup spesis enggau timbang ekosistem.
Mensia mayuh mega dilalau ngambika enda ngachau tauka ngenyemakka diri enggau jelu siga, tang lengkas ngeripot ngagai piak bekuasa ngambika atur jampat sereta likun ulih dipejalaika.
Kerejasama entara ejensi penyelamat, piak bekuasa enggau komuniti beguna amat dalam ngenegapka pengawa ngintu, lalu enggau nya nentuka biodiversiti Sarawak terus dijaga ungkup rebak dudi hari. – RBI
