KUCHING, 26 Mac — Pengeransing ngenegapka sektor betanam betupi Sarawak majak chakah dipejalaika nengah chara teknologi lebuh Kaban Kunsil Nengeri (ADUN) Krian, YB Friday Belik nemuai meri basa ngagai Direktor Betanam Betupi Sarawak, Dominic Anak Chunggat ba Indu Opis Betanam Betupi Sarawak kena Hari Dua tu tadi.
Penemuai nya mega ditangkan enggau sesi penerang teknologi ari industri, ti ngaul pengawa penerang ari HarvestNet Sdn. Bhd ba chara mutarka E2 SaaS enggau CMQIP Industrial Development Holding (M) Sdn. Bhd. ti fokus ngagai pemansang robotik enggau teknologi pemintar tiru (AI) dalam sektor betanam betupi.
Penerang nya ngemeratka potensial aplikasyen teknologi pintar dalam industri padi, nyengkaum ngena automasyen, dron, sistem analisis data enggau mekanisasyen moden.
Chara tu dipeda ulih nambahka pemanah operasyen ladang, ngurangka bepanggai ba pengereja pengawa sereta nambahka asil pemansut enggau chara ti lebih produktif sereta meruan.
Rambau randau nya, semua piak mega bisi besilih penemu pasal peluang kerejasama strategik, pengawa bejalaika projek pemungkal sereta pengawa ngenegapka rentayan bekal industri beras di Sarawak nengah chara betanam betupi pintar.
Inisiatif tu setipak enggau aspirasyen Perintah Sarawak ti deka ngenegapka sektor betanam betupi nengah digitalisasyen enggau aplikasyen teknologi ti meri empas tinggi, lalu enggau nya ulih nyungkak tikas ngatika diri beras (SSL) nengeri tu nuju nyapai pengelikun pemakai ti meruan. — RBI
Sumber, photo — Jabatan Pertanian Sarawak Friday Belik Official
