BETONG, 26 Mac – Panggau pemerindang deka richah lebuh Regatta Betong 2026 mantaika dua bengkah pekit besai ke beprestij iya nya Battle of the Band enggau Regatta Betong Idol ke diperambu deka diatur berengkah 22 ngagai 25 April ba Pelaman Regatta Betong (Waterfront).
Atur pengawa Battle of the Band deka diatur kena 23 April (pemungkal) enggau 25 April (penudi), nyendiaka perais mata duit nyentuk RM2,000 ngagai champian, ditangkan RM1,000 ungkup lumur dua enggau RM800 ungkup lumur tiga.
Bela dipekit iya nya kategori khas baka vokal pemadu manah, pemain dram pemadu manah, pemain gitar pemadu manah, keyboard pemadu manah enggau pemain bass pemadu manah.
Berebak enggau nya, Regatta Betong Idol ke berengkah tumu agi kena 22 April tu ila mega besemaya deka nyadi bepekit ti chukup rami ngayanka bakat belagu menua tu.
Champian deka mai pulai perais mata duit RM800, lalu lumur dua deka bulih perais mata duit RM500 lalu lumur tiga deka bulih RM300, kelimpah ari anugerah vokal pemadu manah enggau pemerindang pemadu manah.
Dua bengkah pekit tu ukai semina muka ruang ngagai penau baru dipandangka ba panggau pemerindang, tang mega nyadi pelasar dikena ngangkatka industri seni menua tu ngagai tikas ke tinggi agi, kelebih agi di Betong.
Mensia mayuh ke bisi ati tau ngerejista enggau bayar RM100 ungkup Battle of the Band enggau RM30 ungkup Betong Idol nengah chara scan QR kod ke bisi disediaka ba poster rasmi pengawa nya.
Regatta Betong 2026 dikearapka ulih matak mayuh temuai datai enggau bemacham rintai program ti ngerinduka ati, lalu enggau nya ngerichahka agi gaya pengerami rayat ba kandang Betong. – RBI
Infografik kredit Betong Xcess
