KALIMANTAN UTARA, 25 Mac – Penemuai ngagai Long Nawang sehari tu muka cherita baru dalam ngenegapka kaul serantau enggau semengat bebakih ke udah lama bisi entara komuniti garis entara menua Malaysia enggau Indonesia.
Nitih ku Datuk Wilson Ugak Kumbong ke mega Sapit Menteri Digital ti nguluka raban nya, pengawa baka tu beguna amat dalam ngenegapka kaul dua piak, kelebih agi ba kandang adan menua ti bekunsika budaya enggau pengidup ninting hari.
Raban ti disempulang Opis Residen enggau Pelilih Menua sereta kelab 4×4 ti ngaul urung 100 buah entukar, disambut enggau manah ari komuniti menua nya lebuh datai ba kandang menua nya.
Pengerami nerima pengabang nya mega diias enggau adat asal kelai basa enggau kaul rat entara kededua piak.
Penatai raban nya disambut Gabenor Kalimantan Utara, Gubernur Kalimantan Utara, Camat Kayan Hulu sereta Ketuai Adat Apau Kayan ti mantaika sukung ngagai pengawa ngenegapka kerejasama entara garis entara menua ungkup pengelantang begulai.
Berebak enggau nya, kelab 4×4 nya mega mantaika penyiru ati nengah meri kereban perengka tulis enggau perengka lumba enggau main ngagai peranak menua nya, lalu enggau nya nyungkak semangat begulai dalam komuniti.
Sebedau neruska pejalai sida, raban nya mega bisi ngetu ngabas Kem Soldadu Rejimen Sempadan di Tapak Megah kelai meri terima kasih ngagai raban pengelikun ti seruran bebendar ngetanka kedaulatan enggau pengelikun menua. – RBI
