KUALA LUMPUR, 24 MAC — Opis Menteri Wang Malaysia (MOF) ngambi perati enggau berat bekaul enggau pengerembai video ba laman rama ti mandangka siku individu ngisi petrol RON95 ngagai tong puang ba sebuah stesyen minyak.
Pansik udah tetemuka individu ke bisi kaul nya peranak menua Malaysia sereta pemegai MyKad. Ulah iya nya terang ngelanggar atur ketegal salah guna subsidi minyak ari baruh Program BUDI95, lalu enggau nya ngeruga pengawa perintah nentuka pengawa ngatur subsidi ti terang, bisi tagit sereta meruan.
Berindik enggau nya, MOF madahka atur ke terit deka dipejalaika nyengkaum nyekat kad pengelala ke dikena dalam transaksyen nya sereta nginsil kelayakan pengempu entukar ari terus ngasaika penguntung BUDI95.
Nitihka penerang opis menteri nya, perintah enda deka belembut ba sebarang tukuh pemansut enggau salah guna subsidi, kelebih agi ba gaya ke diatu ti begunaka pengawa nagang enggau terit bekal minyak enggau rega. Pengawa neritka atur deka terus ditambah dikena nagang pengawa ti nadai tanggungpengawa tu.Berebak enggau nya, perintah beterima kasih ngagai pengirau ati rayat ti udah mansang ke mua dikena ngenataika sebana.
Mensia mayuh diperansang terus meri penerang sereta ngaga sebana rasmi nyema bisi tetemuka sebarang aktiviti ti bisi ngelanggsr atur bekaul enggau pengawa ngagihka subsidi nengah Palan Servis BUDI MADANI. -RBI
