BINTULU, 23 Mac – Lapan ari 24 kuarters kontena angus lengis ba penusah angus ke nyadi ba kandang endur Tekat Ai Bakun tumu pagi tadi.
Ari penyampau nya, lapan unit udah angus 100 peratus, seraya api mujur dijaga ari nyerarai ngagai unit bukai.
Pengari Palan Gerakan Operasyen Bomba enggau Penyah Penusah (PGOB) Sarawak madah, sida nerima kangau ngenyit bekaul enggau penusah nya urung pukul 4.02 pagi.
Nitihku iya, seraban bomba terus dianjung ngagai palan penusah nyadi pengudah nerima kangau nya.
“Lebuh datai ba endur nya, ditemu penusah angus nya mungkur 24 buah kuarters kontena,” ku iya nengah penerang berita sehari tu tadi.
Ku iya nambah, operasyen madamka api nya dipejalaika ngena dua hos bantu tumu enggau ai ti bepun ari paip bomba ke besemak.
Operasyen nya mega nerima bantu ari Raban Timbal Penusah Ngenyit (ERT) Bakun ti bejalaika pengawa madamka api keterubah sebedau penatai raban bomba.
“Naka ke diatu, nadai sebarang ripot diterima bekaul enggau orang ke nguan kuarters nya,” ku iya.
