BELAWAI, 19 Feb — Siku orang berikan dikeirauka lemas pengudah iya diripotka lenyau ngenyit maya mukat undang ba kandang pantai Kampung Tepi Laut, lemai kemari.
Mansa benama Sabaruddin Awang Kamarudin, 48, peranak menua nya ari genturung pendiau tu lalu bedau ditemu pengudah operasyen ngiga enggau nyelamat (SAR) dipejalaika tekala nya pengudah penusah nya nyadi.
Ketuai Polis Pelilih Sarikei, Superintenden Aswandy Anis madah, raban sida nerima ripot pengelenyau mansa urung pukul 5.21 lemai.
“Bepelasarka saksi mensia mayuh ba endur nya, mansa dipeda lemas ngenyit seraya jari iya kepai-kepai minta bantu sebedau lenyau ari atas ai.
“Pansik tumu mega tetemuka mansa nadai ngena jaket pengelikun maya penusah nya nyadi,” ku iya ba sebengkah penerang sehari tu tadi.
Berindik ari ripot nya, operasyen SAR bersepadu diaktifka ti ngaul 61 iku pemesai polis, Opis Bomba enggau Penyah Penusah Malaysia (JBPM), Raban Pengelikun Mensia Mayuh (APM) enggau peranak genturung pendiau nya enggau bantu 19 buah bot.
Aswandy madah, radius ngiga diatu udah dikerembaika nyengkaum penyauh tiga kilometer ari endur kepenudi mansa dipeda, enggau fokus besai ba semanjai tebing tasik Kampung Tepi Laut.
Polis mega nesau mensia mayuh ti bisi penerang bekaul enggau penusah tu ngambika lengkas betanya ngagai Pemesai Pemansik Kes, Sarjan Rafiee Berawi nengah lumur 016-5227983.
Berebak enggau nya, piak bekuasa ngingatka komuniti orang berikan ngambika seruran ngemeratka sukut pengelikun, nyengkaum ngena jaket pengelikun maya di tasik dikena ngurangka risiko bebadi nyawa. — RBI
