JEMATAN BATANG IGAN DIBUKA, BUKTI KOMITMEN PERINTAH NEGAPKA PEMANSANG INFRASTRUKTUR SARAWAK
IGAN, 16 Mac — Pengawa muka Jematan Batang Igan ngagai mensia mayuh sehari tu nyadika sebengkah agi pekara ti beguna dalam pemansang infrastruktur nengeri tu lebuh enggau rasmi ngetuka urung 30 taun operasyen servis feri ti udah lama nyadi batang penyambung di sitak nya.
Sapit Premier Sarawak ti mega Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas madah, pengawa muka jematan nya siti momen besejarah, kelebih agi ngagai komuniti di Igan enggau kandang menua ngelingi ke sebedau tu bepanggai ba servis feri meraka sungai.
Nitihku iya, berengkah ari sehari tu, jematan nya ulih dikena penuh mensia mayuh, lalu enggau nya ngelai pengujung pangku pengawa feri ke udah meri servis ngagai kandang menua nya nyau deka tiga dekad.
“Enggau penembu jematan tu, servis feri ke udah lama nyadi batang penyambung ditu diatu nyadi sebagi ari sejarah ungkup peranak menua nya,” ku iya lebuh dikerandau pengarang berita ba Pengerami Pra Ngelancharka Jematan Batang Igan ditu, sehari tu tadi.
Ku iya nerang, jematan pemanjai 1.439 kilometer ke digaga ngena ungkus RM285.5 juta nya ngayanka komitmen perintah nengeri ngenegapka rentayan infrastruktur enggau ngemanahka perengka guna penyambung jalai di Sarawak.
Uggah mega nerangka taun tu nyadi “taun ngetau jematan” lebuh sekeda agi projek jematan di serata nengeri disadang tembu sereta dibuka ngagai mensia mayuh dalam timpuh ke semak tu.
Ku iya, pemujur nembuka projek nya ngayanka pengeran Premier Sarawak, Datuk Patinggi Tan Sri Abang Johari Tun Openg, dalam ngamatka agenda pemansang nengeri tu, nyengkaum semaya deka ngaga lebih 20 buah jematan di serata Sarawak.
Nitihku iya, projek nya dipelanja ngena belanja perintah nengeri pengudah sekeda projek jematan nyengkaum Jematan Batang Igan dikinsil Perintah Besai ba taun 2018 suba.
“Taja pia, perintah Sarawak udah ngambi inisiatif ngiga pemisi belanja kediri empu dikena nentuka projek tu ulih diteruska nyentuk ke mujur ditembu,” ku iya.
Ba pemansang ke sama, iya andal amat servis feri ari Kuching ke Miri deka diketuka abis ujung taun tu lebuh semua projek jematan ke benung dipejalaika diatu udah tembu penuh.
Ku iya, ke diatu agi bisi beberapa endur baka Paloh ke ngena servis feri, tang perengkaguna nya deka diketuka enti projek ngaga jematan ba kandang menua nya tembu ila.
“Pengawa tu mega seriris enggau Strategi Pemansang Pasca COVID-19 2030 (PCDS 2030) ti nagit Sarawak nyapai status nengeri bepenatai pemisi tinggi manggai ba taun 2030,” ku iya.
Sama bisi ngulu atur pengawa nya, Kaban Parlimen Igan, Haji Ahmad Johnie Zawawi, Ahli Parlimen Tanjung Manis, Dato Ir. Yusuf Abd Wahab, Ahli Dewan Undangan Negeri (ADUN) Semop, Datuk Abdullah Saidol, ADUN Jemoreng, Datuk Dr. Juanda Jaya, ADUN Balingian Abdul Yakub Arbi, ADUN Tellian, Royston Valentine enggau Direktor Opis Kereja Raya Sarawak Datu Adj. Prof. Ir. Ts. Gs. Br. PMr. Dr. Cassidy anak Morris — RBI
