JULAU – Program KRT Begulai Enggau Komuniti Nanga Bilat di Rumah Genta udah nyadi pelasar beguna dalam pengawa meri penyedar ngagai mensia mayuh bekaul enggau bemacham keruga rama baka pengawa nipu nengah ‘online’ enggau salah guna dadah.
Chairman Kaunsil Industri Kayu Ramu Malaysia (MTIB) ke mega Kaban Parlimen Julau, Datuk Larry Sng Wei Shien madah, program baka tu meri awak ngagai ejensi perintah nurun ke renggat baruh sereta bekunsika penerang ke beguna enggau komuniti menua pesisir.
Nitih ku iya, enti nadai penerang ke baka nya, mayuh peranak nyangka enda nemu pasal bansa dadah ke dikelala enggau nama “batu” sereta pangka iya ke enda manah ngagai pengidup enggau pengelantang komuniti.
“Program ke baka tu beguna amat laban meri awak ngagai ejensi perintah ngajar mensia mayuh pasal penanggul rama baka dadah enggau pengawa nipu nengah online.
“Enti kitai enda nemu pasal pekara nya, enti datai ba kitai, kitai enda nemu lalu udah nya kitai enda ulih enda ingat,” ku iya.
Ku iya nambah, penyedar komuniti beguna amat dikena nentuka sebarang kelai salah guna dadah ba genturung pendiau ulih dikelala tumu.
Kelimpah ari nya, iya mega ngemeratka pemesai guna mensia mayuh ngeripot pengawa nipu nengah ‘online’ ngagai piak bekuasa baka polis tauka ejensi ke bekaul ngambika atur ke bukai ulih dipejalai.
Ba pemansang ke bekaul, iya mega ngingatka mensia mayuh ngambika bejimat agi laban taktik nipu diatu nyau majak canggih nyengkaum ngena teknologi pemintar tiru (AI) dikena nunda sada nyawa tauka identiti siku-siku individu.
“Penipu enda milih orang. Enda ngira kitai kaya tauka seranta, semua orang ulih nyadi mansa.Pemar iya nya semua kitai patut bejimat sereta bejaga agi,” ku iya nyemetak.
Iya ngarapka program penyedar komuniti baka nya ulih dipajakka dikena ngenegapka pemereti ati mensia mayuh ba isu rama ti tau ngeruga pengelantang enggau pengelikun komuniti lokal. -RBI
