LIMBANG, 7 Mac — Penusah tanah tusur ke nyadi ba Kampung Bukit Kota lemai tu tadi ngeruga tiga buah rumah besemak sereta ngempang jalai besai di kandang menua nya.
Nitihka penerang berita ari Opis Bomba enggau Penyah Penusah Malaysia (JBPM) Sarawak, opis nya nerima kangau ngenyit bekaul enggau penusah nya urung pukul 2.11 lemai sebedau seraban raban ari Balai Bomba enggau Penyah Penusah Limbang dianjung ngagai endur ke bepalan urung tiga kilometer ari balai nya.
Raban bomba ke datai beberapa minit udah nya tepedaka penusah tanah tusur udah nuntung tiga buah rumah ke besemak sereta ngempang jalai besai ba kandang endur nya.
Taja pia, pengawa meresa enggau silik agi ngentaska nadai mansa diripotka bisi kaul enggau penusah nya.
Komander Operasyen, Stanley Liaw madah, piak bomba udah bejalaika pengawa matau ba endur penusah nya nyadi lalu ngelalau sida ke nguan rumah ke kena penusah mindah ari rumah sida laban gaya ba endur nya diasaika enda likun.
“Kitai mega ngelalau peranak ke besemak mindah ngagai kandang endur ke likun agi nyadika chara bejejaga dikena nyeliahka sebarang penusah nangkanka nya nyadi,” ku iya.
Ku iya, penusah runtuh nya mega ngujungka paip besai bekal ai enggau beberapa iti tiang karan ba endur nya rusak.
Operasyen matau nya mega dipatau Ketuai Zon Limbang, Ramlan Ramlan, kelimpah ari penatai Kaban Parlimen Limbang, Datuk Hasbi Habibollah enggau Kaban Kunsil Nengeri (ADUN) Bukit Kota, Datuk Abdul Rahman Ismail.
Operasyen ti ngaul dua iku raban enggau sebuah entukar pacuan empat roda nya tembu enggau penuh pukul 5.00 lemai pengudah gaya nya dientaska ulih dijaga, seraya pengawa matau ke silik agi deka terus dipejalaika ari sesiti maya ngagai sesiti maya dikena nentuka nadai agi penusah runtuh nyadi.
Sama bisi mantu ba palan penusah nyadi iya nya Polis DiRaja Malaysia (PDRM), Sarawak Energy Berhad (SEB), Angkatan Pengelikun Mensia Mayuh Malaysia (APM), Opis Residen enggau Sarawak Water. — RBI
