PAKAN, 7 Mac – Peranak menua pesisir dilalau nguna tanah ke bisi sereta ngena pelasar digital dikena ngenegapka ekonomi sereta nyungkak penatai pemisi ruang bilik.
Tesau nya dikenataika Tan Sri William Mawan Ikom lebuh bejadika Projek Program Transformasyen Menua Pesisir (RTP) ba Rumah Awin, Sungai Amut, ditu.
Nitihku iya ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega Kaban Kunsil Nengeri (ADUN) Pakan, ngena tanah enggau produktif ulih nyadi pematak pemansang ekonomi komuniti menua pesisir.
Iya mega meransang peranak beambi ulih ari perengkaguna jalai kebun ke udah digaga ngambika asil betanam betupi ulih ditanam enggau ngasi agi sereta ngemudahka pengawa ngangkut asil ngagai pasar.
Ku iya nambah, pemansang teknologi kemaya hari udah muka peluang ke besai ngagai komuniti ngelakuka produk betanam betupi nengah bemacham pelasar digital ke majak ngerembai.
Berebak enggau nya, iya ngingatka bala komuniti ngambika enda teparuk enggau pekara ti tau ngerusak penyerakup enggau pemanah kaul dalam komuniti.
“Anang kitai ngerembaika pekara ti tau ngerusakka kaul entara komuniti tauka ngembuan runding ti tau mambarka komuniti,” ku iya.
Ba pengerami nya, Biro Indu Rumah Awin mega bisi nerima pemeri RM5,000 dikena nyukung pengawa bejalaika aktiviti komuniti di kandang menua nya. -RBI
