KUCHING, 12 Mei – Kaban Kunsil Nengeri (ADUN) Tamin, Ir. Christopher Gira Sambang mantaika sukung penuh ngagai Rang Undang-undang (RUU) Kaunsil Padi enggau Beras Sarawak 2026 ti dibantaika Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom ba Aum Kunsil Nengeri (DUN) Sarawak sehari tu.
Dalam jurai iya, iya nyemetak madahka rang undang-undang nya ukai semina ngaul sektor betanam betupi aja, tang nyadi atur strategik dikena nentuka pengelantang, pengeliat ati enggau penjamin pemakai Sarawak jemah ila.
Nitih ku iya, dunya diatu betapi enggau bekal pemakai global ti enda tentu berindik ari ubah gaya hari, penyarut geopolitik, pengeruga rentayan bekal, ungkus import ti majak nambah enggau ekonomi global ti enda tegap, enggau nya minta Sarawak ngurangka bepanggai ba import beras.
“Pengelikun pemakai ukai agi semina isu betanam betupi aja, tang diatu nyadi isu kedaulatan, pengelikun strategik enggau penegap ekonomi timpuh panjai nengeri tu,” ku iya.
Iya mega nyemetak madahka penumbuh Kaunsil Padi enggau Beras Sarawak setipak enggau aspirasyen Strategi Pemansang Pengudah COVID-19 2030 (PCDS 2030) ti ngemeratka pengelantang ekonomi nengah pemansang ti meruan sereta pengelikun pemakai.
Ku iya, kaunsil nya deka bejalaika tanggungpengawa ti beguna nyadi institusyen pemansang strategik nengeri ti bisi kuasa merambu sereta ngemansangka industri padi enggau beras, ngatur belanja, nyendiaka belanja, bejalaika pengawa beranakka puku, numbuhka kompeni, ngaku kandang endur pemansang sereta ngumpul data industri ti komprehensif.
“Tu ngayanka pengeran Perintah Sarawak deka nempa sektor pemakai siti ari tiang strategik ekonomi nengeri tu.
“Sarawak udah mansutka diri nyadi kuasa besai lalu diatu kitai patut nyingkang nuju nyadi kuasa besai pengelikun pemakai,” ku iya.
Berebak enggau nya, iya meda rang undang-undang nya mega muka peluang besai ngagai menua pesisir nyengkaum Tamin, Selangau, Mukah, Kanowit enggau Kapit ti ngembuan pemesai tanah sereta potensial besai ungkup pemansang betanam betupi moden.
Iya ngarapka perintah ulih ngerembaika sistem ai moden, meri kelala teknologi betanam betupi pintar, ngena dron, mekanisasyen betanam betupi, palan ngumpul asil ketau enggau pansik benih padi ti bekualiti tinggi dikena nambahka produktiviti orang bumai menua pesisir.
Kelimpah ari nya, iya mega ngemeratka pemesai guna ngaul raban nembiak dalam sektor betanam betupi moden.
Kenu ku iya, anggap ti ngumbai pengawa betanam betupi nadai jemah ila patut diubah laban sektor nya diatu majak mansang senipak enggau teknologi, inovasyen, automasyen, pemintar tiru (AI) enggau sektor betanam betupi moden.
Berindik enggau nya, iya merambu ngambika kaunsil nya meri kelala program latih betanam betupi nembiak, skim agropreneur muda, geran pemungkal enggau latih teknologi betanam betupi moden dikena ngadaka rebak baru orang dagang agro di Sarawak.
Dalam jaku iya Iya mega ngelaluka kuasa kaunsil ngumpul data industri laban data ke betul beguna amat dikena mantu perintah merambu tagit ngatika diri, rizab beras strategik, peragam peminta enggau ngatur bekal pemakai timpuh panjai ungkup nengeri tu.
Berebak enggau nya, iya ngemeratka pemesai guna pengawa tadbir urus enggau akauntabiliti laban kaunsil nya deka ngembuan kuasa wang ke besai nyengkaum ngaga duit injau, beranakka puku enggau numbuhka kompeni.
Berindik ari nya, iya ngarapka pengawa audit ninting taun, ripot ti terang, matau prestasi enggau integriti ngatur pengawa diberi perati ti berat dikena nentuka penguntung nya amat diasaika rayat.
Lebuh nyimpul jurai nya, Gira nerangka rang undang-undang nya siti singkang ti strategik sereta beguna dikena nempa pengidup dudi hari ti lebih tegap ungkup Sarawak.
“Kitai enggaika rayat bisi duit tang betapi enggau suntuk pemakai.
“Minyak enggau gis nyangka ulih ngenegapka ekonomi Sarawak, tang beras nyamin pengidup rayat,” ku iya. -RBI
#ruaiberitaiban#newsiban#beritaiban
Rindu | Titih | Kunsika
