BINTANGOR, 28 Mac – Balai Bomba enggau Penyah Penusah (BBP) Bintangor chakah bejalaika Kimpin Ngetuka Pengawa Betunu Tebuka dikena meri penyedar mensia mayuh pasal risiko enggau empas negatif aktiviti nya, kelebih agi maya hari panas enggau kemarau.
Nitihka penerang ari Ketuai BBP Bintangor, PPgB Mahmudin Narudin madahka, pengawa betunuka chara tebuka tau ngasuh angin kamah sereta sebun angin ti ngeruga pengerai mensia mayuh.
Ku iya, kelimpah ari nambahka risiko penusah angus ti enda ulih ditagang ti muntang nyerarai ngagai kandang kampung tauka genturung pendiau ti besemak.
Kelimpah ari nya, pengawa raban bomba mega deka nambah enti kes betunu tebuka nyadi mayuh, lalu enggau nya bisi potensi ngeruga pengulih tim nya nimbal penusah ngenyit bukai ke lebih balat agi.
Berindik enggau nya, mensia mayuh dilalau ngambi atur nagang nengah chara nyeliahka sebarang aktiviti betunuka chara tebuka, kelebih agi maya musin panas.
Pengawa nguna baru enggau ngatur uras ti ‘mesra’ rampa menua mega diperansang nyadi chara ti likun agi.
Berebak enggau nya, komuniti mega dipinta lengkas ngeripot sebarang penusah betunu chara tebuka ngagai piak bekuasa.
Enti bisi pun api, pengawa patut dipejalaika dikena madamka api enggau penuh ngena ai dikena nyeliahka api nya nyadi baru.
Mensia mayuh mega dilalau ngambika enda betunuka uras ba endur ke tebuka, tang ngena sistem muai uras ke udah disediaka tauka chara ngaga teda uras.
Sebarang penusah ngenyit bekaul enggau penusah angus ngelingi Bintangor tau dipadah terus ngagai Balai Bomba enggau Penyah Penusah Bintangor ba lumur 084-694444 tauka talipaun penusah ngenyit menua 999.
Kimpin tu sebagi ari pengawa ti seruran dipejalaika opis bomba dikena nentuka pengelikun mensia mayuh sereta nyaga rampa menua ari penusah angus. – RBI
