BETONG, 10 Mac — Sapit Premier Sarawak, Datuk Amar Douglas Uggah Embas, ngelalau rayat nengeri tu ngambika terus ngenegapka penyerakup sereta meri sukung ti tegap ngagai Premier Sarawak, Datuk Patinggi Tan Sri (Dr) Abang Johari Tun Openg, deka neruska agenda pemansang nengeri taja pan betapi enggau mayuh pemar.
Iya nyemetak madahka penyerakup entara bansa enggau jalai pengarap nyadi aset pemadu beguna ngagai Sarawak, kelimpah ari nyadi pelasar ti ngemudahka pengawa perintah nengeri ngatur sereta bejalaika pemansang ungkup pengelantang rayat.
“Dalam gaya ke diatu ke mayuh pemar, kitai patut terus ngenegapka penyerakup entara kitai sereta meri sukung ke tegap ngagai Premier Sarawak ngambika iya ulih terus ngemansangka Sarawak sereta napi sebarang pemar ke datai ba jalai iya,” ku iya madah ngagai media pengudah bejadika Pengerami Nyuaka Bubur Lambuk enggau Spaoh Bersungkey Begulai enggau Ketuai ditu, Hari Enam tu tadi.
Ku iya nerang, asil ari penegap enggau penyerakup rayat, Sarawak diatu meda bemacham pemansang nyengkaum infrastruktur baru enggau projek ekonomi ti betuju ngangkatka tikas pengidup rayat, kelebih agi di Spaoh.
Entara projek ke diatu sereta deka meri pemaik ngagai kandang menua tu iya nya STOLport Bebuling, CPPC Bebuling, Jematan Sungai Paku ti disadang tembu bulan April tu, lalu pia mega bemacham projek bukai ari baruh pegai Ejensi Pemansang Bagi Menua Betong (BDDA).
Ba pengawa ke sama, Uggah mega nerangka pemendar RM20 juta ari Premier Sarawak dikena ngangkatmanah masjid enggau rumah temuai di Kampung Spaoh nyadi pemeri ke chukup besai reti ngagai peranak menua nya.
Kelimpah ari nya, pemeri mega bisi disuaka ngagai komuniti menua nya, nyengkaum 10 buah surau di Spaoh ke tiap bengkah nerima RM5,000, lalu Masjid Al Syifa Spaoh nerima RM10,000.
Sepenyampau 942 Ketuai Ruang Bilik nerima RM300 siku, lalu empat Komiti Pemansang enggau Pengelikun Genturung Pendiau (JKKK) nerima RM5,000 seiku, dikena mantu bejalaika aktiviti komuniti enggau ngemanahka perengkaguna kandang menua.
Sama bisi datai bini iya, Datin Amar Dato Doreen Mayang, Kaban Parlimen Betong Dato Dr Richard Rapu, Sekretari Politik ngagai Premier Sarawak, Puan Roseline Mapong Sabai, enggau Ketuai Indu PBB N.37 Bukit Saban, Puan Natasha Nasa Douglas. — RBI
