SIBU, 7 April – Siku lelaki peranak menua tu ke beumur urung 60 taun ditan pengudah dipechayaka bisi kaul enggau sindiket mai diesel subsidi belalai ba pengawa nyerungkai bot tunda di Ulu Lanang, ditu.
Ketuai Polis Pelilih Sibu, ACP Azari bin Miskon madah, pengawa ngenyit nya dipejalaika kena 3 April 2026 entara pukul 9.30 pagi nyentuk 7.50 lemai ari tim polis Divisyen E8 Indu Opis Polis Pampang Khas Sarawak (IPCK) begulai enggau Pampang Khas IPD Sibu enggau Opis Menteri Dagang Dalam Menua enggau Belanja Idup (KPDN) Pampang Sibu.
Nitihku iya, operasyen nya mungkur pengawa meresa bot tunda Sinar Pelutan 1 ti sangkai ba Pengkalan Sarawak Chemical Industries, Ulu Lanang.
“Asil peresa nya tetemuka bisi 132,000 liter minyak diesel ke disimpan dalam semilan tangki ba kapal nya enggau anggar rega RM283,800,” ku iya ba sebengkah penerang.
Ku iya nambah, penyampau semua rega barang ke dirampas nya nyengkaum kapal dipelabaka manggai RM773,600.
Pansik keterubah tetemuka bot tunda nya udah sangkai ba pengkalan nya urung sebulan enggau dalih iya bisi pengerusak injin sereta benung dikemanah sebedau iya diperambu deka belayar ngagai Kepulauan Solomon.
Diatu kes nya benung dipansik ari baruh Seksyen 21 Akta Kawalan Perbekalan 1961 lalu semua pengawa ngetan enggau ngerampas udah diserah ngagai KPDN Sibu ngambika atur nangkanka nya dipejalaika.
Berebak enggau nya, iya nyemetak madahka Polis Diraja Malaysia kelebih agi IPD Sibu deka terus chakah agi bejalaika pengawa pemansik dikena ngelaban pengawa mai barang subsidi belalai.
Mensia mayuh ke bisi penerang bekaul enggau sebarang pengawa ti dipelabaka dipinta datai ke mua lalu ngenataika penerang nya ngagai piak bekuasa. – RBI
