BAU, 15 MAC – Siku lelaki madahka diri udah mechahka cheremin kerita polis ba palan entepan Indu Opis Polis Pelilih (IPD) Bau tengah hari kemari enggau pengarap diri deka ditangkap lalu diengkah ba lokal dikena nyeliahka diri ari dituduh nyadi ‘mata-mata’ polis.
Ketuai Polis Pelilih Bau, Superintenden Mohd Haide A. Rahman madah, pansik tumu tetemuka saspek ke beumur 32 taun nya ngaku ngereja pengawa nya laban iya enda tan napi pengachau ‘suara halus’ ke nuduh iya nyadi mata-mata polis bekaul enggau aktiviti orang gian dadah ba menua nya.
“Penusah nyadi urung pukul 1 lemai lebuh siku pemesai polis tepedaka saspek bejalai nuju sebuah kerita polis sebedau mansutka tukul lalu mechahka cheremin pesinjir kiba belakang kerita nya,” ku iya ba sebengkah penerang kemari.
Ku iya, pemesai nya terus ngelawa saspek lalu minta bantu ari bakih ke sama gawa enggau iya sebedau lelaki nya mujur ditan ba palan penusah nyadi.
Ku iya nambah, saspek mega bisi bakal mimit ba jari tunjuk kanan ketegal kena repik kacha maya ngereja pengawa nya.
Nitihku iya, saspek dibai berubat ngagai Sepital Bau sebedau ditan dikena mantu pengawa mansik silik agi.
“Polis mega bisi ngerampas tukul ti dipelabaka dikena ba penusah nya lalu peresa ai kemi ba saspek ditemu negatif dadah,” ku iya.
Kes tu dipansik ari baruh Seksyen 90 Akta Polis 1967 enggau Seksyen 427 Kanun Keseksaan.- RBI
