MERADONG, 25 Mac – Siku lelaki diukum jil pengelama 38 bulan ulih Kort Majistret Sarikei pengudah ngaku salah ba tiga iti dawa bekaul enggau penyalah nyimpan sereta nyual barang churi.
Ukum nya diberi Akim Kort Sarikei, Puan Stella Agustine Druce, pengudah beratika pengaku salah orang ke dituduh ti enggau nya ngelimatka awak enggau ungkus kort.
Nitihka dawa, orang ke dituduh ditemu salah nyimpan perau ke bisi injin churi, kelimpah ari nyual perau enggau tali karan enggi piak bukai.
Iya ditangkap Bagi Pansik Jenayah Indu Opis Polis Pelilih (IPD) Meradong kena 3 Februari 2026.
Kes nya dipejalai ari baruh Seksyen 411 Kanun Keseksaan ti nyendiaka ukum jil nyentuk lima taun tauka ukum mata duit tauka kededua nya, pia mega Seksyen 414 kod ke sama ti mai ukum jil entara enam bulan ngagai tujuh taun enggau ukum mata duit.
Pansik ke silik agi tetemuka perau enggau injin ke disimpan orang ke dituduh nya enggi Ee Tai Shipping Sdn Bhd, lalu tali karan ke dijual nya enggi kompeni TP Power (M) Sdn Bhd.
Orang ke dituduh nya mega ditemu nyual sebuah perau enggi siku individu peranak menua nya ke beumur 53 taun.
Pengawa meresa rikod jenayah mega tetemuka orang ke dituduh nya bisi tujuh rikod jenayah sebedau tu enggau empat rikod bekaul enggau dadah.
Kes tu dipejalaika Pemesai Pendawa Raya Polis, Inspektor Herry Anak Alban.
Berebak enggau nya, Ketuai Polis Pelilih Meradong, DSP Tansli Mering nyemetak madahka raban polis beratika kaul individu enggau jenayah reta tengkira enggau dadah enggau berat, lalu ngelalau komuniti ngambika ngenyauhka diri ari pengawa ke baka nya ti tau ngujungka nyadi palan jenayah. -RBI
