KUCHING, 17 Mac – Tuduh ari baruh Seksyen 376(1) Kanun Keseksaan ti nyendiaka ukum jil nyentuk 20 taun enggau sipat nyadika pelasar kes siku lelaki beumur 31 taun ke dituduh masung siku nembiak indu ke bedau chukup umur.
Orang ke dituduh nya taja pia ngaku diri enda salah ba Kort Sesyen ditu, sehari tu, ba dawa nya.
Nitihka keretas dawa, lelaki nya ke gawa nyadi supervisor palan endur ngaga rumah, dituduh ngereja penyalah nya urung pukul 7 malam kena 4 Mac 2025 di Pantai Abang Amin, Lundu.
Kes tu tebantai pengudah nembiak nya ngaga ripot polis ti udah nya ngujungka orang ke dituduh ditan.
Maya prosiding nya, Sapit Pendawa Raya Chuah Kai Sheng minta haribulan ngatur kes baru lalu mantah jamin ketegal pemerat penyalah nya, ke mega dikategori ari baruh Seksyen 52B Kanun Keseksaan.
Kort udah nya netapka 15 April 2026 nyadi haribulan ngatur kes lalu enda ngemendarka orang ke dituduh diberi jamin. – RBI
