SIBU, 6 Mac – Opis Kereja Raya (JKR) Sarawak udah mujur ngatur Sesi Linat Urus Pengatur Sebana 1/2026 dikena berandauka isu bekaul enggau pengawa ngatur sebana mensia mayuh sereta pemanah jalai sebana ti disediaka opis nya.
Aum nya bechairmanka Sapit Direktor Sumber Mensia enggau Hal Ehwal Korporat, Josenthiana anak Manggie, lalu digulu bala pemesai enggau pengari ari Bagian JKR enggau pampang ti bekaul.
Randau nya ngemeratka pengawa ngangkatka pemanah pengawa ngatur sebana mensia mayuh sereta ngenegapka jalai komunikasyen entara opis enggau komuniti.
Dalam aum nya, statistik sebana ke diterima nengah mayuh bengkah pelasar nyengkaum Talikhidmat, Media Sosial enggau JKR Sarawak RoadCare bisi dibantaika.
Aum nya mega beratika timpuh bejalaika pengawa ba setiap sebana kelimpah ari ngelala chara ngemanahka agi dikena nentuka sebana ulih diputarka enggau jampat sereta efektif agi.
Aum nya mega ngemeratka pemesai guna kerejasama entara pampang dikena nentuka timbal ngagai orang ke ngaga sebana ulih diberi enggau chara ti lebih sistematik, terang sereta responsif.
JKR Sarawak komited deka terus ngangkatka pemanah kualiti meri servis ngagai rayat nengah chara nentuka tetiap sebana ke diterima diberi perati ke berat, lalu atur ke patut diambi ungkup pengelantang enggau pengelikun penguna perengka guna mensia mayuh. -RBI
