PAKAN, 7 MAC – Sepenyampau RM50,000 udah diungkupka ngagai pengawa ngerataka palan perambu ngaga rumah panjai baru di Rh Dinggai, Amut, nyadi singkang pemungkal dikena nyendiaka perengka guna pengentap pendiau ke lantang agi ungkup komuniti menua nya.
Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan anak Ikom, madahka agih belanja nya dikena mantu ngenyampatka pengawa nyendiaka palan ungkup projek ngaga rumah panjai baru ba sitak nya.
Nitih ku iya, pengawa pemansang di menua pesisir meseti disukung penuh ari komuniti ngambika semua projek ti diperambu ulih dipejalaika enggau lanchar ungkup pengelantang peranak menua nya.
“Perintah seruran nguji mai pemansang ngagai menua pesisir. Nya alai, komuniti meseti beserakup lalu anang teparuk enggau politik mit ti tau mechahka komuniti,” ku iya.
Iya madah munyi nya lebuh ngabas palan ke diperambu endur ngaga rumah panjai baru di Rh Dinggai Amut, Pakan, seharitu tadi.
Berebak enggau nya, iya mega mantaika pengingin ati iya deka meda pengawa ngaga jematan ti ulih nyambung kandang menua nya enggau Sekula Kebangsaan (SK) Sembawang, dikena ngemuntangka pemindah peranak, kelebih agi bala nembiak enggau staf sekula.
Ku iya ke mega Kaban Kunsil Nengeri (ADUN) sitak Pakan nambah, peluang pemansang ke dibai perintah meseti diguna enggau penuh ulih komuniti menua nya.
“Anang bepechah entara diri sama diri, tang lebih agi tanka penyerakup komuniti ngambika kitai enda tinggal ari arus pemansang,” ku iya.
Ba pengerami ke sama, iya mega bisi madahka agih belanja penyampau RM5,000 ngagai Biro Indu Rh Dinggai dikena nyukung pengawa bejalaika aktiviti enggau program komuniti ba rumah panjai nya. -RBI
