KAPIT, 25 Mac — Kaban Parlimen Kapit, YB Dato Sri Alexander Nanta Linggai, ngemeratka komitmen iya nentuka pemansang di sitak Parlimen Kapit terus dipejalaika, taja pan tanggungpengawa iya nyadi Menteri Kereja Raya ba renggat menua begunaka perati ba projek infrastruktur besai menua tu.
“Nyadi siku menteri ti megai tanggungpengawa ba infrastruktur menua nyengkaum Jalai Besai Pan Borneo, Jalai Perintah Besai enggau mayuh macham projek perintah Besai, awak aku endang amat sekat.”
Taja pia, aku tetap nguji ngatur jam enggau belanja aku enggau manah dikena nentuka pemansang ba sitak Parlimen Kapit terus dipejalaika,” ku iya nerang lebuh bejaku ba Pengerami Bejadi Projek RTP enggau Ketuai Begulai Enggau Rayat di Rumah Annie Isop, Nanga Pelagus, Batang Rajang.
Iya nyemetak madahka kerejasama rat entara pengari rayat ari baruh Gabungan Parti Sarawak (GPS) balat ngemudahka pengawa merambu enggau bejalaika pemansang.
“Ba DUN Pelagus, aku gawa rat enggau YB Wilson Nyabung;ba DUN Bukit Goram begulai enggau YB Datuk Jefferson Jamit Unyat;lalu ba DUN Katibas begulai enggau YB Lidam Assan.
“Lebuh kitai dalam siti tim, semua perambu nyadi lebih teratur lalu pengawa bejalaika iya lanchar agi,” ku iya.
Nyadi Chairman URDA, iya madahka bemacham projek besai udah mujur dipejalaika, nyengkaum ngaga jematan meraka Sungai Batang Rajang ti beungkus lebih RM300 juta, ngaga Indu Opis Polis Pelilih Menua (IPD) baru, enggau projek ngaga jalai alun ari Semaram ngagai Nanga Belawai.
Ku iya nambah, “Penyampau semua agih belanja pemansang ungkup Bagi Menua Kapit diatu udah ngelui RM1 bilion.
Teruska semengat ‘segulai segulai’, bekerejasama sereta nyingkang begulai ungkup jemah ila ke lebih mansang ungkup Kapit.”
Iya mega minta rayat beserakup lalu anang bepechah, seraya nyemetak madahka proses ngulihka agih belanja pemansang ukai pekara ke muntang.
“Tim ke bisi diatu entara ADUN enggau Kaban Parlimen chukup manah, aram meh kitai ngetan sereta terus nyukung,” ku iya.
Ba pengerami nya, YB Dato Sri Alexander mega bisi madahka agih belanja RM30,000 ungkup pengawa dapur rumah panjai enggau RM5,000 ngagai tetiap Biro Indu, lalu penyampau semua nya manggai RM150,000.
Iya nyemetak madahka pengawa nempa ketuai rebak baru mega deka terus dipejalai, taja pan pemutus kepenudi deka mengkang bepanggai ba ketuai tetinggi nengeri tu.
“Aku deka ngemeratka komitmen aku terus ngelawa rayat ba renggat baruh sebarang maya ke ulih, lalu pengudah lebih 30 taun dalam politik, aku seruran bebendar ngasah penau nembiak rebak baru nyadi ketuai baru,” ku iya nambah.
Iya nyimpul jaku iya enggau meri besai terima kasih ngagai sukung enggau pengandal rayat, seraya ngemeratka pengawa beperang ngemansangka Kapit deka diteruska. — RBI
Sumber, photo — Alexander Nanta Linggi
