BALAI RINGIN, 10 April – Rentayan jalai alun menua pesisir ba sitak Dewan Undangan Nengeri (DUN) Balai Ringin majak ditegapka ari baruh inisiatif Ejensi Pemansang Bagi Menua Sri Aman (SADA), nengah pengawa bejalaika projek Jalai Kampung Ubah ngagai Kampung Empaling ti beungkus RM39 juta sereta mega pengawa nyambung enggau Kampung Isu enggau belanja tambah RM7 juta.
Semua nya sebagi ari pengawa perintah ti ngenataika bantu belanja dikena bejalaika mayuh macham projek ti meri empas tinggi ti berega beratus juta ringgit nuju ngubah rampa sosio-ekonomi kandang menua nya.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, entara batang pemerat iya nya mutarka isu bekal ai lebuh Opis Menteri Pemansang Menua Pesisir enggau Kandang Menua ngemendarka agih belanja sepenyampau RM110 juta dikena ngangkatmanah Loji Ai Pantu.
Nitih ku iya, projek tu mungkur pengawa ngaga tangki ke ngembuan kapasiti manggai enam juta liter dikena nangkup guna peranak ari Pantu nyentuk ke Jaong.
Iya madah munyi nya lebuh bejaku ba Pengerami Bejadika Program Begulai Komuniti Siri 1/2026 enggau Pengerami Nyuaka Setipikit Nyiri enggau Ngelanjarka Ketuai Kaum enggau Ketuai Ketuai Raban Bansa (KMKK) DUN Balai Ringin, kena Hari Lima tu tadi.
Berebak enggau nya, iya ke mega Kaban Kunsil Nengeri (ADUN) Balai Ringin madahka pemansang infrastruktur jalai alun mega udah chakah agi dipejalaika nengah projek ngangkatmanah Jalai Kampung Tuba sepemanjai 42 kilometer enggau ungkus belanja RM265 juta.
Projek besai tu dikearapka ulih ngangkatka akses peranak, lalu enggau nya ulih nyungkak aktiviti ekonomi kandang menua.
Kelimpah ari nya, perintah mega meda potensial sektor dagang temuai nyadi pematak ekonomi baru enggau perambu ngemansangka Wong Jaban nyadi palan eko-dagang temuai ti mungkur ungkus anggar RM4.6 juta.
Beserimbai enggau pemansang fizikal, pengawa ngenegapka pengawa ngiring komuniti mega udah diberi perati nengah pengawa ngatur Program Begulai Komuniti ke diatu benung masuk siri ketiga dipejalaika.
Ba pengerami ke sama, sepenyampau 46 iti setipikit chiri baru enggau sambung udah disuaka ngagai penghulu, tuai rumah enggau kapitan dikena ngaku tanggungpengawa sida ngiring raban bansa.
Sama bisi datai Pemesai Opis Pelilih Pantu Raca Mulong, Penguasa Opis Tanah enggau Survei Bagi Menua Sri Aman Michealson Nisen sereta temuai dipebasa ke bukai. -RBI
