Ketuai Polis Pelilih Bintulu, Supt Nixon Joshua Ali madah, ketiga – tiga saspek beumur entara 25 ngagai 42 taun ditan nengah pengawa datai ngenyit ba mua rumah ba Jalai Bintulu/Tatau urung pukul 3.30 lemai.
Nitih ku iya, tanya keterubah tetemuka semua saspek ngaku bisi kaul enggau kes ngerumpak rumah di Tanjung Kidurong, enggau modus operandi nagit rumah bansa lot tisi puang dikena enchuri aircond enggau tali karan karan ngambika dijual baru.
Ku iya nambah, raban nya mega ngena sebuah kerita Toyota Camry enggi apai siku ari saspek dikena bejalaika aktiviti jenayah.
“Pengawa meresa rikod tetemuka dua iku saspek nya ngembuan mayuh penyalah enggau lapan enggau empat rikod sebedau tu ti bekaul enggau kes dadah, enchuri perengka pengangkut enggau ulah kasar dalam ruang bilik,” ku iya.
Kes tu dipansik ari baruh Seksyen 457 Kanun Keseksaan ti netapka ukum jil nyentuk 14 taun sereta ulih diukum mata duit tauka sipat ketegal penyalah suah nyadi.
Semua saspek udah dibai ngagai Kort Bintulu ngambika dipinta riman ngambika dipansik enggau silik agi.
Berebak enggau nya, iya nyemetak madahka polis enda belembut ba penyalah reta tengkira lalu deka terus chakah agi bebendar ngelaban aktiviti jenayah di pelilih tu.
Mensia mayuh mega dilalau ngambika seruran nyaga pengelikun rumah diri sereta ngenataika penerang ngagai polis nyema bisi tetemuka sebarang pengawa ti disangka.
-RBI-
