LIMBANG, 8 Mac — Palan Pengenduh Sementara (PPS) ba Balai Mensia Mayuh Medamit ditu dibuka urung pukul 11.30 malam, Hari Enam dikena nampung sida ke tasah ampuh bah ari kandang Ujung Jalai ti dituntung ujan bangat enda ngengetu kenyau ari malam Hari Lima tu tadi.
Nitihka penerang ari Angkatan Pertahanan Awam Malaysia (APM) Limbang, sepenyampau 10 iku mansa ti mungkur lima iku lelaki enggau lima iku indu ari empat ruang bilik dipindah ngagai palan nya.
Situasyen ba PPS diripotka ulih dijaga enggau manah enggau penyampau 23 iku raban ari mayuh bengkah ejensi ti ngaul diri dalam pengawa ngatur enggau operasyen bantu ungkup mansa.
Entara ejensi ti ngaul diri iya nya Angkatan Pertahanan Awam Malaysia (APM), Opis Pengintu Pengelantang Raban Bansa (JKM), Polis Diraja Malaysia (PDRM), Opis Sukarelawan Malaysia (RELA) enggau Opis Bomba enggau Penyah Penusah Malaysia (JBPM).
APM Limbang madah, pengawa matau enda ngetu dipejalai lalu semua ejensi ke bekaul udah nyikap diri napi sebarang peluang nyema gaya ampuh bah majak balat.
Mensia mayuh mega dilalau seruran bejejaga, ngasika jaku tangkan piak bekuasa sereta nyeliahka diri ari tama ngagai kandang endur ti kena penusah ketegal pengelikun begulai.
Sebarang penusah ngenyit tau dipadah nengah talipaun APM Limbang ba lumur 085-210471 tauka talipaun penusah ngenyit MERS 999. — RBI
