BETONG, 2 April — Projek ngaga Dewan Mayuh Guna di Nanga Gayau, Betong diatu benung ngerikod penyulut fizikal 74 peratus lalu dipelaba tembu penuh dalam bulan Mei 2026.
Pekara nya dipadahka rambau penemuai kereja rasmi ngagai palan projek ti betuaika Direktor Besai Opis Biokeselamatan, Dr.Lornie Enggong, begulai enggau raban iya.
Penemuai nya dipunka enggau sesi meri penerang ba Opis Opis Kereja Raya (JKR) Bagi Menua Betong ti dikenataika Injinir Bagi Menua, Jason Ng Boon Tuan, sebedau disambung enggau pengawa bejalai ngabas palan endur ngaga Dewan nya.
Projek tu entara inisiatif ari baruh Program Kampung Angkat MADANI enggau skop dipejalaika nyengkaum ngaga balai mayuh guna ti lengkap enggau perengka guna opis, jamban, sistem mekanikal enggau elekterik sereta mega kereja infrastruktur luar.
Pengawa ngaga Dewan tu ngembuan tuju deka nyendiaka perengka guna infrastruktur moden sereta kondusif ngagai komuniti ngelingi, kelimpah ari befungsyen nyadi palan endur bejalaika mayuh macham aktiviti rama, program pemansang komuniti enggau pengerami rasmi.
Perengkaguna nya dikearap ulih meri empas positif ngagai pengelantang enggau kualiti pengidup peranak di kandang menua Nanga Gayau enggau kandang ngelingi nya.
Sama bisi datai rambau penemuai nya Ketuai Penulung Direktor Unit Penyelarasan Pelaksanaan (Zon Sri Aman), pengari Palan Servis P204 Betong enggau bala ketuai komuniti kandang menua nya.
Opis Kereja Raya Bagi Menua Betong ngemeratka komitmen nentuka projek tu tembu nitihka timpuh ke udah ditetapka enggau ngemeratka kualiti, pengelikun sereta penguntung timpuh panjai ngagai rayat. — RBI
