MIRI, 28 Mac — Pengawa ngemansangka menua pesisir di Sarawak patut diperesa enggau komprehensif sereta bepelasarka fakta, ukai bepelasarka persepsyen sempit tauka penerang ti ngemaruhka pangku pengawa projek infrastruktur baka jalai alun enggau jematan.
Sapit Menteri ba Opis Premier Sarawak (Buruh, Imigresyen enggau Pematau Projek), Datuk Gerawat Gala madah, penemu ti ngemaruhka pemansang menua pesisir enda ngambi kira selampur polisi enggau strategi pemansang komprehensif ti benung dipejalaika perintah nengeri.
Kenu ku iya, pemansang Sarawak enda bepanggai ba siti projek tauka sektor aja.
“Tang iya, ari baruh pentadbiran perintah nengeri, chara pemansang dipejalaika enggau komprehensif nengah chara begulaika aspek infrastruktur, ekonomi, rama enggau rampa menua.
“Bepuluh taun, komuniti di kandang menua ulu napi pemar kediri, enggau komunikasyen entara genturung pendiau bepanggai ba perau, jalai kampung enggau jalai tebang kayu.
“Ba gaya hari ti enda manah, akses ngagai sekula, sepital enggau pasar suah tekeruga,” ku iya.
Ku iya nambah, gaya tu diatu benung berubah asil ari pengawa bejalaika pengawa ngaga renyatan jalai alun enggau jematan ti muka akses, nyambung komuniti sereta nyadi penyungkak transformasyen rama enggau ekonomi menua pesisir.
“Pengawa ngaga infrastruktur tu ukai semina projek fizikal aja, tang nyadi pelasar pemansang timpuh panjai.”
“Enti nadai perengka guna pemun baka jalai alun enggau jematan, pemansang sektor pelajar, pengerai enggau ekonomi enda ulih dipejalaika enggau manah,” ku iya nerang.
Ku iya nambah, penyulut ke dijapai sehari tu (kemari) asil ari pengawa bejalaika polisi ti konsisten sereta perambu strategik ti bestruktur, nyengkaum nengah ejensi pemansang kandang menua baka Ejensi Pemansang Tanah Tinggi (HDA), Ejensi Pemansang Ulu Rajang (URDA), Ejensi Pemansang Wilayah Utara (NRDA) enggau Kaunsil Pemansang Koridor Wilayah (RECODA).
Chara pemansang nya nyengkaum pemansang infrastruktur fizikal, ngenegapka ekonomi nengah pengawa beranakka puku enggau industri, sereta ngemanahka perengka guna rama nyengkaum pelajar enggau pengerai.
Berebak enggau nya, perintah Sarawak mega udah ngemeratka pengawa ngatur kampung enggau meruan nengah chara ngurangka tikas pemansut kayu, meri kelala kampung ladang, neritka agi pengawa ngeluarka lisin nebang kayu sereta ngerembaika kandang endur nyaga kampung enggau penuh.
“Chara tu nyata ngayanka pemansang ekonomi enggau nyaga rampa menua ulih dipejalaika enggau chara ti sebela,” ku iya.
Nitih ku iya, empas pemansang diatu nyata diasaika rayat lebuh orang bumai ulih ngelakuka asil sida enggau mudah agi, bala nembiak bisi akses ke manah agi ngagai pelajar, lalu pesakit jampat agi nerima perubat, lalu ari nya nyungkak penumbuh ekonomi menua pesisir.
Iya nyemetak madahka pemansang ukai nyadi dalam timpuh ke pandak lalu ukai asil ari siti projek aja, tang enti nadai pelasar baka jalai alun enggau jematan, nadai pemansang ulih berengkah.
Berindik enggau nya, perintah Sarawak deka terus bebendar nentuka pemansang ti inklusif sereta sebela ngambika komuniti menua pesisir mega ulih ngasaika penyulut selampur.
“Penerang ti ngemaruhka pengawa ngemansangka menua pesisir enda relevan lalu semina mandangka pengurang penemu dalam transformasyen pemansang,” ku iya. — RBI
