SRI AMAN, 9 April — Biro Pelajar Orang Indu Parti Rayat Sarawak (PRS) Pusat udah ngatur Sesi Bejalai Ngenegapka Orang Indu: Pelajar, Penyedar enggau Peneraju Siri 1 (2026) ti nyadi ba Hotel Seri Simanggang, Sri Aman, sehari tu.
Program tu mujur ngempuruka 400 iku penyereta ti mungkur pengari ari 20 Bagi Menua Indu PRS ari serata Sarawak, lalu enggau nya mandangka komitmen tinggi orang indu dalam ngenegapka diri nengah pelajar enggau nambahka penyedar.
Kaban Parlimen Sri Aman, YB Dato’ Sri Doris Sophia Brodie dalam jaku penutup iya nyemetak madahka pelajar nyadi pelasar ti beguna dalam nempa pemujur individu enggau mensia mayuh.
Nitih ku iya, penyedar bejalaika tanggungpengawa muka ruang ngagai orang indu meretika hak sida, ngerebut peluang sereta nempa pengarap diri dalam mayuh macham bidang.
“Pelajar ti disempulang enggau penyedar sereta mega pengeliat ati enggau komitmen ti enda ngetu ulih ngadaka orang indu ti kompetitif sereta ulih meri pangka ti besai ngagai pemansang nengeri tu,” ku iya.
Sama bisi bekunsika penemu enggau peneleba dalam sesi nya, YB Senator Rita Insol, Sapit Presiden PRS enggau Kaban Dewan Negara, pia mega Puan Rosaline Neging, Sapit Ketuai Orang Indu PRS ke mega Sekretari Politik Ngagai Premier Sarawak.
Pengawa ngatur program tu nyadi pelasar ti beguna dalam ngenegapka jaringan, nambahka penemu sereta nerenakka semengat nyadi ketuai ba raban indu, setipak enggau aspirasyen pemansang ti inklusif sereta meruan di Sarawak. — RBI
