DEBAK, 26 Mac — Fasiliti Palan Pengerembai Berita Nasional (NADI) digambarka nyadi pelasar beguna dalam meri kuasa ngagai komuniti menua pesisir nengah akses digital enggau pengawa ngerembaika penerang perintah enggau komprehensif.
Kaban Parlimen Betong, Dato Dr. Richard Rapu madah, inisiatif ti dipejalaika Suruhanjaya Komunikasi dan Multimedia Malaysia (SKMM) ari baruh program Pemberian Perkhidmatan Sejagat (PPS) ukai semina nyendiaka akses Internet, tang mega muka ruang ungkup pemansang kapasiti komuniti setempat.
“NADI bejalaika tanggungpengawa beguna amat dalam meri kuasa ngagai komuniti nengah bemacham program ke meri empas baka pengawa dagang, e-pelajar sepemanjai umur enggau nambahka tuai runding ba pengawa ngena Internet,” ku iya rambau nemuai ngagai NADI Kampung Tuie, Debak.
Iya mega nyemetak madahka palan nya nyadi pelasar besai dalam nyadung penerang bekaul enggau mayuh bengkah inisiatif perintah nyengkaum PADU, Manfaat MADANI enggau BUDI MADANI.
“Palan tu mega nyadi pelasar beguna dikena nentuka komuniti menua pesisir enda tinggal ari arus pemansang menua,” ku iya nerang.
Nitih ku iya, pemisi perengka guna baka NADI amat besai reti dalam pengawa ngerapitka seraka digital sereta muka mayuh agi peluang ngagai komuniti menua pesisir ngambika terus mansang sereta ulih besemekih.
Penemuai nya ngayanka komitmen iya ti terus nentuka pemansang digital ulih diasaika enggau inklusif semua renggat mensia, kelebih agi di menua pesisir. — RBI
Sumber, photo — Dr Richard Rapu
