Malam ti rami ba Meritz Hotel Miri nyadi saksi kenang besejarah lebuh pekit Miss Heritage Sarawak 2026 ngemataka Ratu keterubah iya dalam gaya ti penuh enggau elemen elegan, pesaka enggau temegah ati bekaul budaya, apin lama ke udah.
Ngena peluang tu, Ruai Berita Iban ngerandau sekeda sida ti teulihka pemujur ba pekit nya.
Pengudah nengah renggat nyediaka diri enggau terit, latih tambah enggau pemerindang kepenudi ti ngalitka ati, Jessie Ulung Jeffry dipadu nyadi champian, lalu enggau nya megai tanggungpengawa nyadi duta ungkup budaya enggau komuniti Sarawak.
Penuduk lumur dua diempu Stacy Rosedyana Sigar lalu ditangkanka Chelsea Inez Aran Kong ba penuduk lumur tiga, lalu Phynterliana Agatha Lambeh enggau Jane Pidang Kase bela ba lima penuduk pemadu atas.
Pemenang nya ukai semina ngaku elegan, tang mega ngayanka komitmen bala penyereta ngetanka pesaka asal.
Jessie Ulung Jeffry nyemetak madahka pemujur nya muka ruang dikena meri kelala budaya komuniti iya ke kurang dikelala ngagai mensia mayuh.
“Aku meda pelasar nya nyadi medium ti beguna dikena bekunsi sereta mantaika penyelai pesaka asal, seraya ngelakuka penyelai budaya Sarawak ti kaya enggau main asal sereta identiti iya empu,” ku iya.
Pengawa nya nitih ku iya, dikearap ulih meri penyedar sereta nerenakka asai temegah ati ngagai komuniti nuju pesaka asal nengeri tu.
Berebak enggau nya, Stacy Rosedyana Sigar nerangka penyereta iya nyadi peneleba ti chukup berega, kelebih agi peluang begulai enggau penyereta bukai ari mayuh macham pupu bansa.
“Peneleba nya ngasuh aku nemu penyelai main asal sida empu, lalu enggau nya ulih ngenegapka agi pengangkun aku ngagai pengaya pesaka asal Sarawak,” ku iya nerang.
Ba Chelsea Inez Aran Kong, pesaka main asal Sarawak mesti terus diintu ngambika enda dilalaika singkang jeman.
Iya nyemetak madahka pesaka tu nyadi pelasar penumbuh identiti komuniti kemaya hari tu, lalu rebak baru bejalaika tanggungpengawa ti beguna dalam nentuka iya terus dipejalaika.
“Bepegai ba jaku sempama “enti nuan enda nemu, nuan enda rindu”, aku pechaya, pengawa meri kelala enggau dalam pasal pesaka asal deka nerenakka asai temegah ati enggau tanggungpengawa ngetanka iya ungkup rebak dudi hari,” ku Chelsea madah.
Ungkup selampur, pengawa ngatur Miss Heritage Sarawak 2026 ukai semina nyadi panggau dikena ngerami pemajik enggau penau, tang mega nyadika pelasar ke besai reti dalam ngangkat, ngetan sereta ngelakuka pesaka asal Sarawak ngagai tikas ke tinggi agi. -RBI
