Dunya penabur berita Iban enda pungkang enggau penatai raban pemberita ke tebangkar nama, ti mandangka jaku Iban udah seriris enggau jaku bansa bukai.
Ke serak tu ba sukut personaliti Ruai Berita Iban (RBI) bisi udah ngerandau siku pemberita ke chukup chakah sereta tebangkar nama, pia mega suah dipeda ayan ba televisyen menua tu.
Nya alai, RBI deka mantaika Madeline anak Dugat, 35, ke asal ari Rumah Jalang Nanga Sumpa, Lubok Antu,Sri Aman Sarawak dikena meri peransang ngagai nembiak rebak baru seraya mantaika bakani iya ngepunka singkang ba dunya penabur berita.
“Ba keterubah aku dalam bidang tu kebendar mayuh pemar laban aku siswa bidang Seni Halus enggau nadai penteba enggau peneleba ba dunya pemberita.
“Aku bepun ari baruh dulu, belajar ari raban mentor keterubah aku ba Seksyen Berita Iban Utusan Borneo iya nya baka Niang Matthias enggau bakih aku Watson Menjang baka, meretika chara nulis berita, nyalin berita enggau ke bukai.
“Nengah pengeransing enggau minat, dia aku ulih ngemasaika diri enggau tangkup pengawa nyadi pemberita,” ku Madeline muka cherita enggau pemberita RBI.
Ku iya, kenang enggau peneleba ke diulih iya pengudah masuk dalam bidang media lebih agi maya iya ke gawa ba surat berita (newspaper) meri pengeludas iya pasal dunya pemberita.
Terang Madeline, beduduk ari nya, iya berengkah meretika guna tangkup pengawa nyadi pemberita TV dalam nyadung penerang ke beguna ngagai mensia mayuh.
“Pengerindu dalam pengawa tu majak besai lebuh aku meda peluang dalam ngangkatka lanting jaku Iban ba dunya penabur berita. Nya mih ngujungka aku bisi juluk deka ngemansangka diri nyadi pemberita TV,” tusui iya.
Ngenang pejalai iya nyadi pemancha berita enggau editor berita baka kediatu, Madeline madahka peneleba gawa ke diulih ngelama tu mayuh mantu ngemansangka iya dalam bidang.
“Pekara tu nengah latih, bekunsi penemu tauka peneleba enggau raban ke tebangkar dalam industri kelimpah belajar ari ‘online’.
“Sepemanjai gawa aku bisi belajar chara bekomunikasyen, nyendiaka berita ke betul, ngatur jam gawa enggau manah, meresa fakta tauka berita enggau silik, nisih berita, nyadung berita enggau chara mudah diperetika mensia mayuh.
“Semua tu nyadi pugu ke entap ngagai aku bejalaika pengawa enggau manah,” ku iya.
Madeline mega bekunsika pengawa diri sebedau gawa ba TVS iya nya iya kala gawa nyadi pengajar (guru ganti) ba sekula sekondari, primari sereta kala ngajar ba Tabika Perpaduan.
Pengudah nya iya diterima gawa nyadi sub-editor dalam seksyen Iban ba Utusan Borneo lebih kurang setahun lebih sebedau masuk TVS.
Ngenang tangkup pengawa nyadi pemacha berita enggau editor diatu, iya nerangka tanggungpengawa nyadi pemacha berita enggau editor ukai mudah.
“Pemacha berita mesti nyadung berita enggau terang, betul sereta professional. Ba awak ke sama, nyikap diri tumu sebedau ‘on air’ nyengkaum beratika skrip enggau fakta, ngaga ‘voice over’ berita enggau intonasi ke betul.
“Nangkan ke nya, editor orang ti ngesan tangkup pengawa nentuka pengamat sesebengkah berita tauka fakta, nisih berita sereta nitihka etika jurnalistik.
“Tanggungpengawa nyadi pemacha berita enggau penyerenih berita TV enggau surat berita enda sama,” terang Madeline enggau lenak.
Bekaul pengawa tauka proses nyediaka berita berengkah ari pengawa nulis skrip nyentuk ke ditabur terus, terang Madeline ketebal agi, pengarang berita ngumpul penerang enggau nulis skrip berita lalu dipasuk dalam buletin.
Pengudah nya ku iya, editor meresa fakta, nisih ayat berita sebedau skrip nya dibaca pemacha berita enggau ‘voice over’.
Pengudah semua kereban berita tembu digaga baru berita nya ulih dibantaika ba TV.
Bekaul penanggul dalam nentuka pemetul enggau kredibiliti berita ti dibantaika ngagai bala peninga, Madeline nyaut madahka pemar dalam nentuka pemetul enggau kredibiliti berita sebedau dibantaika dalam TV iya nya ngenukuka pengamat fakta, nyeliahka penerang pelesu, urus atur jam berita ke serekat, edit berita ngambika mudah diperetika mensia mayuh ti nadai nukar reti asal.
RBI mega nanyaka bakani chara iya ngetanka profesionalisme lebuh mantaika berita ti sensitif tauka berita angat lalu iya nyaut munyi tu.
“Aku ngetanka profesionalisme nengah chara nentuka pengamat berita dientaska dulu, nyadung penerang sechara objektif enggau neutral, nyeliahka ari meri penemu diri empu sereta nguna jaku ke engkeman, ngambika berita sensitif tauka angat dibantaika enggau chara manah sereta alus lalu enda meri penyaru tauka empas negatif ngagai semua,” ku saut iya.
Bekaul tanggungpengawa media dalam niri negika Jaku Iban, Madeline madahka media baka TVS ngesan tanggungpengawa ke besai ngangkatka Jaku Iban nengah mantaika berita sereta program dalam Jaku Iban.
Tu mega ku iya, seraya mantu komuniti meretika isu kemaya hari, ngenanka lanting budaya enggau identiti komuniti Iban, ngelatih pengawa media ngambika landik dalam pengawa nyadung berita enggau nisih berita nguna jaku Iban, sereta ngembuan chara nyadi platform rasmi ti ngetanka jaku Iban dalam media moden.
Iya mega madahka pengawa ngenataika berita ngena jaku asal ngagai komuniti lokal endang chukup beguna.
“Pekara tu amat beguna laban ulih ngemudahka komuniti meretika berita ti dikenataika, nentuka semua genap pupu bansa bulih akses berita pemadu baru, ngangkatka jaku enggau budaya Iban, negapka identiti komuniti,” ku iya.
Madeline mega bekunsika sekeda pengawa ti ulih digaga dikena narit ati nembiak rebak baru ngagai berita dalam jaku Iban.
Terang iya, entara inisiatif dikena narit ati nembiak rebak baru iya nya ngasilka konten berita video pandak ba media rama nguna jaku iban baka TIKtok, Instagram enggau youtube,
“Ngatur kuiz tauka program interaktif ti nguji tikas pengelandik jaku Iban enggau isu kemaya hari ke ngaul penyereta rebak biak.
“Pia mega pengawa ngatur woksyop jurnalistik jaku Iban ba sekula tauka Universiti dikena meri pengeludas sereta peneleba praktikal ngagai nembiak,” terang iya.
Iya mega bela nerangka bekaul pemar besai industri media maya diatu iya nya betapi enggau media rama ti nyadung berita ke jampat ngerembai.
“Penatai media rama mega mayuh udah ngubah rampa media nyengkaum empas teknologi baru baka pemintar tiru “Ai” ti ngemuntangka ngaga isi berita tauka sebarang konten ke bekaul ngujungka risiko berita pelesu tauka enda betul.
“Pemar ngagai pemberita maya diatu dibanding suba iya nya penanggul ngaga berita enggau jampat dikena besemekih enggau media rama sereta platform digital seraya nentuka fakta nya betul enggau kredibiliti tejaga.
“Kelimpah ari nya, pemberita diatu mesti enda nentuka konten ti ulih narit ati rebak biak, risiko penerang pelesu ngerembai jampat, sereta nguasa teknologi baru baka AI,” ku iya.
Ngenang TVS nentuka ‘releven’ ba jeman digital ti jampat mansang tu, Madeline mantaika penemu diri iya nya berita relevan dalam jeman digital iya nya berita ti mudah, jampat enggau manah lalu semitan enggau platform digital ngambika mudah diakses, diperetika sereta meri penerang ke beguna ngagai mensia mayuh.
Pia mega, nyadi siku orang ti udah mujur endang bisi orang mega dibelakang nyadi tiang sukung ti ulih meri inspirasyen pemaju enggau penyulut.
“Aku mayuh ngambi inspirasyen ari pengarang berita enggau editor ke mayuh peneleba sekalika ari menua luar tauka dalam Malaysia, ti bisi dedikasyen nyadung berita ke betul, profesionalisme , intergriti tinggi dalam nentuka fakta ke betul sebebau dipansutka kelimpah ngembuan nilai etika.
“Inspirasyen nya mega datai ari Mentor tauka pemekuh media ba stesyen TV lokal ke ngajar aku nilai etika, disiplin enggau chara nyadung berita ke terang,” ku iya.
Madeline mega nerangka nilai-nilai ti pemadu beguna ti patut dikembuan pengarang berita tauka pemacha berita.
“Nilai ke dipegai aku iya nya professional, lurus,ngembuan tanggungjawab ngagai mensia mayuh , ngemeranka etika jurnalistik, komitmen deka terus belajar seraya ngemasaika diri enggau teknologi tauka tren media baru,
“Pia mega enti aku betapi enggau pemar maya gawa, chara aku iya nya nyikap diri penuh sebedau ‘live’ baka meretika skrip enggau fakta berita dulu..
“Pemadu beguna, besampi dulu sebedau macha ngambika ati lantang, ulih fokus enggau nyaga emosyen.
“Kelimpah ari nya, kerejasama ari editor, produser enggau tim produksyen mantu pengelancharka pengawa macha berita ba mua kemera,” ku Madeline nusui.
Madeline mega bisi ninggalka jaku lalau ngagai bala nembiak ke bisi minat ba pengawa naburka berita.
Ku iya, tanka integriti, tentuka fakta berita betul, nguasa pengelandik komunikasyen enggau teknologi media sereta sedia deka belajar enggau gawa ba baruh pemerat tating industri dunya media.
Iya meya ngarapka industri media di Sarawak terus mansang ngerembai, majak dikelala ba tikas dunya, ulih negapka jaku enggau budaya lokal di Sarawak
“Aku ngarapka diri ulih nyadi pemekuh media ti lebih professional sereta mayuh peneleba, landik dalam nyadung berita seraya ngetanka kredibiliti enggau ulih ngangkatka jaku Iban sereta budaya lokal Sarawak baka iban ngagai tikas ke lebih tinggi.
“Ba awak ke sama, ulih meransang enggau meri inspirasyen ngagai nembiak rebak baru dalam dunya media,” tampung Madeline. – RBI
