KAPIT, 15 Mac — Tudah ti diripotka lenyau pengudah bot karam di Sungai Batang Rajang besemak enggau kandang menua Pantu, urung 1.5 kilometer ari Wharf Kubu, Pekan Kapit, kemari ditemu raban Ngiga enggau Nyelamat (SAR) lemas pagi tadi.
Mansa udah dikelala enggau nama Brando Jawi anak Mamba, 25 taun, ari Rumah Kawin, Nanga Peraran, Sungai Katibas, Song.
Sekretari Politik Menteri Kereja Raya, Datuk Alvin Runggah Jimbun ke bisi ba endur nya bisi ngabas sida sebilik ba palan operasyen meri jaku peransang enggau sukung moral lebuh sida nganti pejalai operasyen ngiga mansa.
Iya ke bisi datai begulai enggau Ketuai Penyelaras Palan Servis P215 Kapit, Ambrose Abong Bugek mega ngelimpangka awak betemu enggau sida sebilik tudah ke agi dalam gaya penyinu ati berindik ari penusah nya.
Nitih ku Alvin, iya amat sinu enggau nasit ke nuntung sida sebilik mansa lalu besemaya deka mantu ngenataika bantu ke patut dikena ngelempungka tating sida.
“Aku ngarika Menteri Kereja Raya, Dato Sri Alexander Nanta Linggi ngenataika penyinu ati ngagai sida niang sebilik.
“Kitai deka meda baka ni bantu ke engkeman ulih disalur dikena mantu sida nengah maya ti tusah tu,” ku iya.
Ba penusah ke nyadi urung pukul 3.50 lemai kemari, tudah enggau empat iku bakih ke bukai dipelabaka dalam pejalai pulai ke rumah pengudah mandi ba sungai sebedau perau ke ditepan sida karam.
Nitihka penerang bakih tudah ti ngaga ripot nya, penusah nya dipelabaka nyadi ketegal gelumbang besai ti ditempa sebuah tongkang ti nengah kandang endur nya.
Empat iku bakih tudah mujur nyelamatka diri, seraya tudah diripotka lenyau sebedau operasyen SAR dipejalaika tim Balai Bomba enggau Penyah Penusah Kapit enggau kerejasama Polis Diraja Malaysia.
Tubuh tudah udah nya ditemu melepung ba kandang jeti ili Bandar Kapit pagi tadi, lalu enggau nya ngujungka operasyen ngiga mansa ke udah berengkah kenyau ari kemari. — RBI
