JULAU, 25 Feb – Siku lelaki bebadi pengudah ditimbak ngena senapang patah SBBL 12 lubang ba penusah ke nyadi ba kaki lima sebuah rumah panjai di Entabai, ditu kemari.
Tudah ke beumur 69 taun, siku orang pekebun dientaska bebadi urung pukul 11.49 pagi ba Klinik Pengerai Nanga Entaih ketegal balat bakal ba bau kanan laban kena timbak.
Ketuai Polis Pelilih Julau DSP Alif Haiqal Ramesh bin Abdullah, nengah penerang berita madahka, raban polis nerima penerang keterubah senentang penusah nya urung pukul 12.20 tengah hari sebedau pansik lengkas dipejalaika ba palan penusah ke nyadi.
Nitihka pansik tumu, penusah nya dipelabaka nyadi urung pukul 11 pagi lebuh tudah benung deka masu kaki ba kaki lima sebuah bilik lumur lapan rumah panjai nya pengudah pulai ari kebun sawit.
Saspek, siku lelaki beumur 43 taun ke mega siku orang bekebun belanda ari pintu penama bilik lumur 10 sebedau nimbak ngagai tudah.
Siku saksi ngeripotka bisi ninga munyi senapang lebuh iya benung manggang ba kaki lima bilik lumur enam meda saspek belanda ngagai ruai lalu nimbak tunga ngagai tong ai sebedau meda bisi orang rebah. Laban ke takut, saksi lalu ngelarika diri ke dalam bilik.
Saksi ke mega anak tudah ke bebadi nya mega ke ba bilik lumur lapan, udah nya pansut lalu tetemuka apai iya dibalut darah.
Saksi lalu nyerauh meda apai iya kena timbak di kaki lima lalu ngemai apai iya ke benung di balut darah.
Saspek mega didawa nunjukka senyata ngagai saksi sereta ngemba deka munuh iya, tang mansa dibai ngagai klinik ngambika diperubat sebedau ditukuka bebadi ulih pemesai perubat ke bejalaika pengawa.
Polis mujur ngetan saspek urung pukul 1.35 lemai ba hari ke sama ba bilik iya lalu ngerampas senapang patah SBBL 12 lubang begulai enggau sekeda peluru idup enggau sarung peluru bemacham chap.
Kes tu dipansik ari baruh Seksyen 302 Kanun Keseksaan ketegal penyalah bunuh.
Pansik tumu tetemuka penusah nya dipelabaka bepun ari saspek ti enda puas ati pengudah mansa ngelara saspek tumu pagi urung jam 5 pagi ngambika enda bemain senyata api ba kandang rumah panjai sereta ngemba deka ngeripot ngagai polis.
Tubuh mansa udah dianjung ngagai Opis Forensik Sepital Sibu kena bejalaika pengawa beputung tasat. -RBI
