LUTONG, 31 Mac – Ketuai Balai Bomba enggau Penyah Penusah (BBP) Lutong, PBT II Henry Jugah madahka bisi penambah ke nyata ba kes angus tebuka kelebih agi bekaul enggau penusah angus babas, sepemanjai bulan Mac 2026, enti dibanding enggau dua bulan sebedau tu.
Bepelasarka statistik BBP Lutong ungkup timpuh ari bulan Januari ngagai Mac 2026, penusah angus babas ngerikodka pemadu mayuh iya nya 35 kes, ditangkan penusah angus uras (6 kes) enggau lalang (3 kes), seraya nadai penusah angus kampung dirikod dalam timpuh nya.
Bulan Mac ngayanka peniki ke pemadu besai lebuh 34 kes angus kampung dirikod, dibandingka enggau semina siti kes ba bulan Februari lalu nadai kes ba bulan Januari.
Penusah angus lalang mega nambah ngagai tiga kes dalam bulan Mac, lalu penusah angus uras ngerikod lima kes.
Berebak enggau nya, ungkup penusah angus ti ngaul struktur enggau reta tengkira, dua penusah angus rumah dirikod dalam timpuh tiga bulan nya, lalu semua nya nyadi dalam bulan Mac.
Kelimpah ari nya, penusah angus perengka pengangkut ngerikodka tiga kes, ditangkan enggau kedai (2 kes), kilang tauka gudang (1 kes), perengka karan (1 kes) enggau dapur (1 kes).
Nitih ku Henry, penambah kes angus tebuka kelebih agi ba bulan March dipelaba ketegal gaya hari ti angat sereta aktiviti nunu tebuka ti enda betagang.
Iya mega ngelalau mensia mayuh anang ngaul diri enggau pengawa betunu chara tebuka sereta seruran beratika gaya rampa menua dikena nyeliahka penusah angus ti tau ngeruga pengelikun enggau reta tengkira. -RBI
