MIRI, 1 Mac – Sebuah kerita Mercedes Benz E240 angus ba penusah ke nyadi ba Desa Senadin Fasa 2C, lemai tadi, tang pengawa jampat raban Balai Bomba enggau Penyah Penusah (BBP) Lutong mujur nagang penusah nya ari majak balat.
Ketuai Balai Bomba enggau Penyah Penusah (BBP) Lutong, PBT II Henry anak Jugah madah, raban iya nerima kangau ngenyit urung pukul 3.42 lemai sebedau luching penusah ngenyit bemunyi 30 sikin udah nya.
“Bisi lima iku raban bomba Lutong digerah ngagai endur nya semilan kilometer penyauh lalu datai urung pukul 3.51 lemai.
“Lebuh bomba datai ba endur nya, ditemu sebuah kerita ke ditinggalka enggi orang ke ngaga sebana nya benung angus,” ku iya madah ngagai Ruai Berita Iban.
Nitihku iya, operasyen madamka api berengkah urung pukul 3.52 lemai pengudah ‘pengawa meresa’ dipejalaika dikena beratika tikas angus enggau risiko ngelingi.
“Bomba ngena hos ai sepemanjai 100 kaki ngerara api nyentuk ke padam magang.Api mujur dirara urung pukul 4.10 lemai lalu operasyen tembu seminit udah nya pengudah nentuka nadai agi pun penatai api baru,” ku iya nerang.
Nadai penusah bebadi nyawa diripotka nyadi ba penusah nya.
Sama bisi ba endur nya bisi tiga iku polis mantu nyaga ba palan penusah nya. Kebuah penusah angus nyadi agi benung dipansik piak bomba.
Henry mega ngelalau mensia mayuh anang nejuka perengka pengangkut puang enti enda diperesa ari setiap maya laban bisi risiko pengerusak sistem karan tauka minyak pantis ti tau ngujungka penusah angus nyadi. -RBI
