SARATOK, 28 Mac – Chara siku lelaki ke nadai kereja ngena dawai enggau pemutar skru enchuri kerita Perodua Kancil pengujung iya tebantai lebuh iya ditan polis ba kandang menua Sessang, Kabong, kemari.
Ketuai Polis Pelilih Saratok, DSP Mathew Manggie madah, saspek lelaki ke beumur 27 taun nya ditan berindik ari ripot ke digaga siku orang pinchin ke beumur 71 taun pun bulan Mac tu tadi.
Tudah ngeripotka kerita iya lenyau pengudah ditinggal ba kandang menua Ulu Roban.
Pansik tumu tetemuka saspek pansut ari rumah iya di Krangas, Roban enggau niat deka enchuri kerita nya.
Saspek madahka iya ngena dawai dikena muka pintu kerita sebedau muai pala kunchi ngena pemutar skru dikena ngidupka injin kerita nya.
Polis mega ngerampas kerita bechura emas Perodua Kancil nya begulai enggau perengka dikena ngereja penyalah nyengkaum pemutar skru enggau dawai besi pemanjai 170 sentimeter ba sebengkah jalai ladang di kandang menua Sungai Pasir.
Kelimpah ari ngaku enchuri kerita, tanya silik agi tetemuka saspek mega bisi kaul enggau kes enchuri mutosikal di Jematan Empaong, Roban.
Saspek ngaku udah ngererak komponen mutosikal nya lalu disimpan ba palan pengentap pendiau iya.
Pengawa meresa rikod ke udah tetemuka saspek bisi dua rikod jenayah ke udah bisi bekaul enggau pengawa enchuri enggau salah guna dadah.
Ke bendar, pemutus peresa ai kemi ke pemadu baru mandangka saspek positif Amphetamine enggau Methamphetamine.
Diatu kes nya benung dipansik nengah Seksyen 379A Kanun Keseksaan lalu saspek deka dibai ngagai kort sehari tu ungkup peminta riman dikena mantu pansik ke silik bekaul enggau kaul iya ba kes jenayah bukai ngelingi pelilih menua nya. -RBI
