JULAU, 31 Mac – Kaban Parlimen Julau, Datuk Larry Sng Wei Shien ngemeratka pemesai guna penerang enggau matau akaun bank entara Komiti Pemansang enggau Pengelikun Genturung Pendiau (JKKK) enggau Biro Indu dikena nyeliahka kes nipu duit nengah online ti majak nambah maya ke diatu.
Nitih ku iya, semua piak ti ngatur pekara wang komuniti patut seruran meresa akaun bank sida empu laban bisi bemacham chara nipu ti ngaul kangau telefon, kad kredit, bank enggau internet.
“Enti kitai enda meresa akaun, bisi peluang transaksyen ti enda diperatika.Lebih ngirauka ati, enti bisi pengelaun ngeripot, peluang duit nya pulai baru, sigi nadai,” ku iya lebuh bejaku ba Program Ketuai Begulai enggau Rayat di Rumah Dina, Lasi.
Program tu ngembuan tuju deka ngerapitka kaul entara ketuai enggau komuniti setempat kelimpah meri bantu dikena nyukung pemansang komuniti menua pesisir.
Ku iya nerang, orang dikena tipu agi bisi peluang ngulihka baru duit sida enti ripot nya digaga dalam timpuh tiga bulan, tang enti enda ngeripot pengawa nya tumu, tau ngenataika pengerugi ke enda ulih diputarka.
Berindik enggau nya, iya ngingatka pengawa ngatur akaun JKKK enggau Biro Indu enda patut dilempaika ngagai siku individu aja dikena nyeliahka ari salah guna kuasa.
“Pengawa ngatur akaun enda tau enda digaga begulai sereta terang.Anang semina ngasuh siku individu aja nguasa semua transaksyen laban tu ulih muka ruang ngagai pengawa nipu,” ku iya nyemetak.
Ku iya nambah, pengawa ngaul lebih ari siku individu dalam ngatur pekara wang beguna dikena nentuka tetiap transaksyen ulih dipatau enggau nyemetak sereta nyeliahka penyarut dalam komuniti.
Berebak enggau nya, Larry mega bisi mantaika pengirau ati bekaul enggau kes ke udah nyadi sebedau tu ti ngujungka penyarut ba rumah panjai ketegal isu belanja.
“Pekara baka tu enda patut nyadi ba genturung pendiau kitai.Sida ke dilempaika tanggungpengawa enda tau enda bejalaika tanggungpengawa enggau lurus sereta terang,” ku iya.
Ba pengerami ke sama, iya mega bisi nyuaka agih belanja sepenyampau RM77,560 ngagai sekeda JKKK enggau Biro Indu di sitak nya.
Antara penerima iya nya JKKK Rh Dina Lasi, JKKK Rh Medan Enturong, JKKK Rh Seman Lasi, JKKK Rh Liam ak Ganiang Ulu Sejugam, JKKK Rh Nanja Lasi, Jalai Sawit Sungai Sempit ( Tr Antau ) Gerempung Pekebun Ulu Lasi ( Tr Antau ), Biro Indu Rh Dina, Biro Indu Rh Seman Lasi enggau Biro Indu Rh Medan Enturong. -RBI
